रेशम चौधरी ओ नागरिक उन्मुक्ति पार्टीके भविस्य

अब्बे डिल्लीबजार कारागारमे रहल सांसद रेशम चौधरी १९ पुस २०७८ मे लावा पार्टी निर्वाचन आयोगमे दर्ता करले बाटै । पहिलो नागरिक प्रजातान्त्रिक समाजवादी पार्टी नाउँ ढरलमे अब्बे हुँकार पार्टीक् नाउँ ‘नागरिक उन्मुक्ति पार्टी’ जुरागइल बा । १८ पुस अटवारके जो पार्टी दर्ता कर्ना सुचना कैगैल रहे । मने रेशम अपनेहे उपस्थित होके दर्ता करे जैना मनसुवाले उ डिन ओस्टे खँरक गैल रहे । निर्वाचन आयोगमे पार्टी दर्ता करे जाइक लग कारागार शाखा ओ निर्वाचन आयोगसे अनुमति माँगलमे नैपैलाँ । अन्ततः उहाँ आपन गोसिन्या रञ्जिता श्रेष्ठके संयोजकत्वमे अब्बे लावा पार्टी दर्ता करलैं ।

अपनेहे पार्टी दर्ता करे जाइ नैपैलकमे रेशमहे सुरुके गाँसमे ढुंगा लागल बटिन् । उहाँहे राजनीति कैना सहजिल नैहो कना एक मेरिक सन्देश कारागार शाखा ओ निर्वाचन आयोग डेले बा । लावा पार्टी दर्ता कैना क्रममे रेशम चौधरीक् टोली नच्टि गैटि बाजागाजा सहिट भल्हि निर्वाचन आयोगमे पुगल रहे । मने अपन घरगोस्या रेशम नैरहल कारन उ बाजागाजा फिक्कल रहल ।

थरुहट तराई पार्टी नेपाल पस्चिउँ थरुहटमे एक मेरिक क्षत्रिय पार्टीके अस्रा डेखैले रहे । मने इ पार्टी फोरम लोकतान्त्रिकमे भोंर पैंठ गैल । पाछे फोरम लोकतान्त्रिक नेपाली काँग्रेसमे भोंर पैंठ गैल । पूर्बी थरुहटमे मधेशीलोग जसपा, लोसपा कैके अब्बे २ ठो राजनीतिक डुकान ढैले बाटै । जसपा बन्नासे पहिले राजपामे ६ ठो पार्टी समाहित हुइल रहिट । मने पस्चिउँ थरुहटमे क्षत्रिय पार्टी सुन्य बा । इहे क्रममे थरुहट तराई पार्टीके हस रेशमके नागरिक उन्मुक्ति पार्टी आइल बा । उ अपन चुनाव चिन्ह थरुहट तराई पार्टीके जो लेहल ‘ढकिया’ बनैना निर्नय फेन कैसेकल ।

थरुहट तराई पार्टी समानुपातिकमे गोपाल दहित ओ गंगा सत्गौंवा थारु डुइ जन्हन सांसद बनैना सफल हुइल रहे । सँस्सा नैछुटैलेसे नागरिक उन्मुक्ति पार्टी फेन पहिल चुनावमे जो कम्तिमे एकठो हुइलेसे फेन प्रदेश सांसदके झन्डा गार सेकठ । मने पाछे पाछे इहो पार्टी औरे पार्टीमे भोंर नै पेलि कना का ग्यारेन्टि ? काजेकि रेशमके पार्टी दर्ता हुइना क्रम संगसंगे पाछे एमालेमे छिर्ना हल्ला उर सेकल ।

अकेलि एमालेमे छिर्लेसे भाउ नैडेखैना ओर्से कुछ समय संगठन बिस्तारमे लग्ना ओ एमालेमे छिर्ना रेशमके दाउ रहल एमाले वृत्त हल्ला उरा सेकल । इ हल्लाहे चिरके आगे बह्रे सेक्ना अब्बे रेशमके बरा चुनौती हो । यदि रेशम अन्तिम सास टक अपन पार्टीमे अडिग रहिहि कलेसे पुरुब थरुहटके नन्हे एकठो बल्गर पार्टी बनाइ सेक्हिं । यकर भविस्य ओज्रार बनाइ सेक्हिं । नाहि क्षणिक उद्धेश्य बटिन कलेसे पस्चिउँ थरुहटमे आब फेन डोस्रे जनता लावा पार्टीहे पट्यइना बिया उकठ जाइ ।