बुह्राइल मनै ओ परिवारके दायित्व
कैलालीके कैलारी गाउँपालिका वडा नम्बर ४ एक उडाहरनिय काम कर्ले बा । वडा कार्यालयसे आम्हिक्के द्वन्द्व पीडित, अपाङ्गता रहल, ज्येष्ठ नागरिक ओ एकल महिलन्हे सम्मान सहित ब्ल्यांकेट वितरण करले बा ।
जुरारसे जनजीवन प्रभावित हुइटी रहल बेला वडा कार्यालयसे लक्षित वर्गहे सम्मान सहित एक एकठो ब्ल्यांकेट वितरण करल वडा कार्यालय जनैले बा । वडाध्यक्ष भीखराम चौधरीके अन्सार ४ सय ७० जनहनहे ब्ल्यांकेट डेगइल । ब्ल्यांकेट पाइल पाछे ज्येष्ठ नागरिक लगायत विपन्न व्यक्ति बहुट फोहाइल रहिंट ।
एकठो कहकुट बा, बभना सब जार कटा लेहल । मने चैट्वासि जार कटाइक लग गइया बेंचे पर्लिस । जलवायु परिवर्तनके कारनसे परटेक बरस ओहेमेरि जार, ओहेमेरिक गर्मि बह्रटि बा, जिहिसे छोट छोट लर्कापर्का ओ बुह्राइल मनैन् आउर परेसानि झेले परठ । छोट लर्कापर्कन टे फाटल पुरान झेन्ड्रि झेन्ड्रा लुग्रम सेंह्रलेसे फेन हुइल । मने बुह्राइल मनैन् ओइनके जिउ माफिक लुग्रा लत्ता चहठिन ।
कौनो समय रहे । रुप्या, पैसक् अठकार नैरहे । ओहेसे हुइना खैना मनै फे जरवारके लग डस्या अस्रा लागिट । टब्बे किसन्वा बख्रा पुगाके सब्के लग जरावर सिवाइट । या टे जरावरके लग घरेम केक्रो भोज आइ परे । आब उ जबाना नै रहिगैल । घरक कुछ जिनिस बेंच्लेसे चाहे जब फेन जरावर लेना छेमटा रख्ठाँ बहुटसे घरपरिवार । जेकर कमाहि बा, उ लुग्रा अडलबडल कैके अइरो फैरो नेंगठ । मने घरकु बुह्राइल आजा आजि, बुडु बुडि जेकर जाँगर बौसा नैहो, उ कहाँसे पैसा कमाइ । कहाँसे अपन लग लुग्रा लत्ता लि ?
ओहेसे घरक् किसन्वा याने कि गर्ढुरियक कर्तव्य हो कि घरक् बुह्राइल सदस्यन लुग्रा लत्तासे लेके ओह्रना बिछौनामे ढ्यान डेहक चाहि । यडि घरक् किसन्वा बुह्राइल सदस्यन लुग्रा लत्तासे लेके ओह्रना बिछौनामे ढ्यान डेबि कलेसे वडाहे काजे गुहारे परि ? अपन जनतनके सेवाके लग सरकार मेरमेरिक योजना लन्ना मजा बाट हो । यकर लग कैलारी गाउँपालिका वडा नम्बर ४ धन्यवादके पात्र बा । ब्ल्यांकेट खरिदमे खासे खर्च फेन नै लागल हुइ । मने सरकार हमन हेरल कना जनतनमे छाप पर्ना बरा बाट हो ।
मने खास बुझे पर्ना बाट इ हो कि डाइ बाबन्, बुडि बुडुन लागिन् कि हमार घरक् लर्का हमार हेरबिचार कर्ठा । लुग्रा लत्तासे लेके ओह्रना बिछौनामे ढ्यान डेठाँ । अट्रे सकारात्मक सोचले किल फेन ओइनके उमेर बह्रठिन । ख्याल करि, कहुँ फाटल चडरि ले किल डाइ बाबन्के मन टे नै रुवाइठुइ ?
