संस्कृति देशके पहिचान ओ चिनारी
पहुरा समाचारदाता
सुर्खेत, २७ पुस । माघी पर्वके महान अवसरमे वीरेन्द्रनगरमे लखागिन थारु उत्थान मञ्च, सुर्खेत ओ थारु अर्गानिक सामुदायिक होमस्टे वीनपा ९ तिलपुरके आयोजनामे माघीके महत्वबारे प्रशिक्षण सहित विविध साँस्कृृतिक नाचगान करके शुभकामना आदान प्रदान कार्यक्रम हुइल बा ।
कार्यक्रमके वडका पहुना सुर्खेत वीरन्द्रनगर नगरपालिकाके वडा नं ९ के अध्यक्ष सुरेश कुमार मानन्धर थारुहुकनके ऐतिहासिक चाड माघीमे सक्कु गाउँसे जम्मा हुके मनैना कामसे संस्कृति संरक्षणमे महत्वपूर्ण योगदान पुग्न बटैलै । यैसिन रचनात्मक कार्यक्रमसेफे थारु संस्कृति संरक्षणमे टेवा पुग्न हुइल ओरसे यिहीहे अभिन व्यापक ओ वृहत करटी जाई पर्ना बटैलै ।
संस्कृति देशके पहिचान ओ चिनारी हुइल ओरसे सक्कु जातजातिके संरक्षण कैना संग्रहायलमे वडासे वडाअध्यक्ष हुइल ठेनसे हालसम निरन्तर आर्थिक सहयोग करटी आइल बटैलै । थारु कला संस्कृति संरक्षणके लाग वडा, स्थानीय, प्रदेश तथा संघीय सरकार सक्कु जे महत्व डेहे पर्ना जरुरी रहल बटैलै ।
कार्यक्रमके विशिष्ट पहुना थाकसके सभापति बेचुलाल चौधरी थारुहुकनके मौलिक संस्कृति पहिचान धरोहर माघी पर्व बटैलै । यिहीहे बचैना जिम्मा सरकारसे दायित्व बोध करे पर्नामे वेवास्ता करेबेर संस्कृति धरापमे परटी रहल चिन्ता व्यक्त करलै ।
कार्यक्रममे माघी पर्वके महत्व एवम् मौलिकताके बारेमे नयाँ पुस्ताहे थाहा नइहुके संस्कृतिप्रति सद्भाव हरैटी गैल ओरसे यी बार यी पर्वके महत्वबारे प्रशिक्षणसहित कार्यक्रम मनाइल बाट लखागिन थारु उत्थान मञ्च सुर्खेतके अध्यक्ष मान बहादुर पन्ना बटेलै ।
माघी पर्वके महत्वके बारेमे कार्यपत्र प्रस्तुत थारु संस्कृतिविद एवम् साहित्यकार मानबहादुर चौधरी पन्ना थारुहुकनके महान पर्व माघी मनैना विधि तौरतरिका, समुदायमे यकर महत्व ओ वर्तमान टमान संस्कृतिके प्रभावके चुनौेती ओ नयाँ पुस्तासे अपन संस्कृतिहे आत्मसात करे पर्ना लगायतके विषय उठान करल रहिट ।
लखागिन थारु उत्थान मञ्च सुर्खेतके सल्लाहकार सनिसरा महतम सुर्खेतके थारुहुकनके भाषा संस्कृति संरक्षण संवद्र्धन कैना थारु समुदाय अपनहीफे जागरुक हुई पर्नामे जोड डेहे पर्ना बटैले । युवाहे पुराना पुर्खाहुक्रे सिखाई पर्ना ओ युवाहुक्रेफे अपन संस्कार संस्कृतिहे माया करटी जर्गेना करे पर्नामे जोड डेलै । युवाहुक्रे आबके बडल्टी परिवेशमे सांस्कृतिक रुपान्तरण कैना जरुरी हुइलेसेफे मौलिकताहे भुले नइहुइनामे जोड डेलै ।
कार्यक्रममे थारु वुद्धिजीवि लाल बहादुर चौधरी, जंगलाल चौधरी, अमर चौधरी, शेरबहादुर थारु लगायतके वक्ताहुक्रे थारुहुकनके मौलिक पहिचान बचैना सक्कु जे साथ डेहे पर्नामे जोड डेहल रहिट ।
कार्यक्रममे टमान थारु कलाकारहुकनके थारु नृत्य तथा गीत समेत प्रस्तुत करल रहे । कार्यक्रमके सञ्चालन लखागिन थारु उत्थान मञ्च सुर्खेतके सचिव जित बहादुर चौधरी करलै ।
