सुदूरपश्चिममे ठप्लै ४८८ कोरोना संक्रमित
पहुरा समाचारदाता
धनगढी,४ माघ । सुदूरपश्चिम प्रदेशमे मंगरके रोज ४८८ जाने कोरोना संक्रमित ठपलसंगे सक्रिय संक्रमितके संख्या २१ सय ९३ पुगल बा ।
सामाजिक विकास मन्त्रालय सुदूरपश्चिम प्रदेश स्वास्थ्य निर्देशनालयसे डेहल जानकारी अनुसार पछिल्का २४ घण्टामे ४ सय ८८ जाने कोरोनाके लौवा संक्रमित ठपल बटै । ११ सय ४१ जानेक एन्टीजेन विधिसे परिक्षण करेबेर २ सय ३१ जाने ओ ३ सय ९५ जानेक आरटी पीसिआर परिक्षण करेबेर २ सय ५७ जानेक पोजेटिभ रिपोर्ट आइल मन्त्रालय जनैले बा । कलेसे २१ जाने ठिक हुके अस्पतालसे डिस्चार्ज हुइल बटै ।
मंगरके रोज सुदूरपश्चिम प्रदेशके टमान नाकासे ९ सय ५५ जाने नेपाल लौटेबेर ओइनके एन्टीजेन विधिसे कोरोना चेकजाँच करेबेर १ सय १ जनहनमे कोरोना संक्रमण पुष्टि हुइल बा । गडडाचौकीसे ४३६ जाने लौटेबेर ४६ जनहनमे, जुलाघाटसे ७३ जाने लौटेबेर ५ जनहनमे, गोैरीफन्टा नाकासे ४४२ जाने लौटेबर ५० जनहनमे कोरोना डेखल बा । ओस्टेक नेपालमे कोरोनाभाइरस (कोभिड–१९) संक्रमणके अवस्था भयावह अवस्थामे पुगल बा । मंगर स्वास्थ्य तथा जनसंख्या मन्त्रालयसे जारी करल तथ्यांकअनुसार कोरोनाके परीक्षण करल मन्से झण्डे आधामे संक्रमण पुष्टि हुइल हो । कूल २२ हजार ८३८ जानेक नमुना परिक्षण करेबेर १० हजार २५८ जनहनमे संक्रमण पुष्टि हुइल बा । १७ हजार ८७२ जानेक आरटी–पीसीआर तथा ४ हजार ९५६ जानेक एन्टिजेन परिक्षण करेबेर पीसीआर विधिसे ८ हजार ७३० जाने तथा एन्टिजेन विधिसे १ हजार ५२८ जनहनमे संक्रमण पुष्टि हुइल बा ।
पछिल्का तथ्यांकअनुसार संक्रमणदर समग्रमे ४४.९ प्रतिशत पुगल बा । यी मन्से पीसीआर विधिसे संक्रमण दर ४८.८ प्रतिशत रहल बा कलेसे एन्टिजेन विधिसे ४४.९ प्रतिशत रहल बा । पुसके १९ गते संक्रमण दर समग्रमे २.६ प्रतिशत रहलमे ५ दिनके अन्तरालमे संक्रमण दर रेकर्ड स्तरमे वृद्धि हुइल हो ।
