दार्चुलाके हिमाली क्षेत्रमे हिमपात
दार्चुला, १४ माघ । दार्चुलाके हिमाली क्षेत्रमे दुई दिन भारी हिमपात हुइल बा । जोरसे परल हिमपातपाछे जनजीवन कष्टकर बनल बा । व्यासके छाङ्गरुमे रहल सुरक्षाकर्मी हिमपातके कारण कष्टकर जीवन बिटाइ परल बा । एक सुरक्षाकर्मी कष्टकर जीवन बिटाइ परल बटैले बाटै ।
‘सशस्त्र प्रहरी गुल्म बाहिर निक्रे सेक्ना अवस्था नैहो’, उ सुरक्षाकर्मी कहलै–‘हिउँ पगालके पानी खाके बैठल बाटी, पानी भरे जैना फेन दुई फिट ढिउर हिउँ जमल बा, पानीके पाइप पूरे बरफ बनल बा, पानी पीनाके विकल्प नैहुइलपाछे हिउँ पगालके पानी बनाके पिठी ।’ जुरार अत्यधिक बह्रल कारण सकारेसे रातसम आगी तापके दैनिकी बिटाइ परल बा । अब्बे इ क्षेत्रमे नेपाल प्रहरी, सशस्त्र प्रहरी ओ गाउँमे एक जाने चौकीदार किल रहल बाटै ।
पहिलेक हिउँ पग्लल् नैरहे, थप हिउँ परलपाछे जार ह्वात्तै बह्रल बा । गाउँसम जोरसे हिमपात हुइलपाछे चारुओर उजरे हुइल बा । अब्बे सशस्त्र बैठल गागासे छाङ्गरुसम जैना मुस्किल अवस्था आइल बटाइल बा । इ क्षेत्रमे गैल बरससे सशस्त्र प्रहरी बाह्रमास बैठे लागल हो । गैल बरस फेन इ क्षेत्रमे सशस्त्र प्रहरी हिउँ पगालके पानीके प्रयोग करे परल रहे ।
जिल्लाके अपिहिमाल, नौगाड, मार्मा, दुहूँ, व्यास ओ मालिकार्जुन गाउँपालिकाके उच्च भू–भागमे भारी हिमपात हुइल बा । राष्ट्रके सातौँ धाम मालिकार्जुनमे लम्मा समयपाछे भारी हिमपात हुइल बा । मालिकार्जुनके मन्दिर क्षेत्रमे परल हिउँके फोटो अधिकांश सामाजिक सञ्जालमे शेयर करल बावै । स्थानीय गणेशसिंह धामीके अनुसार मालिकार्जुन क्षेत्रके सडक तथा मन्दिर क्षेत्र आँजरपाँजर हिउँ जमल बा ।
ओस्टके नौगाड क्षेत्रमे फेन भारी हिमपात हुइल बा । नौगाडको सिप्टी, इयरकोट, दल्लेखलगायतके क्षेत्रमे भारी हिमपात हुइल सन्तोषसिंह ठगुन्ना बटैलै । हिमपातके कारण अब्बे इ क्षेत्रके सडकमे गाडी चलैना समेत समस्या हुइल बा । सडक हिलाम्ये ओ बिछहुल हुइल बा । अपिहिमाल गाउँपालिकाके खण्डेश्वरी बजार क्षेत्रसम भारी हिमपात हुइल बा । हिउँके कारण विद्यालय ढाकल बावै ।
खण्डेश्वरीसे उप्परके बस्तीमे एक फिटसे ढिउर हिउँ जमल स्थानीयवासी पोखरसिंह रोकाया जानकारी डेलै । इ क्षेत्रमे स्थानीयवासीहे घर बाहर निक्रना समस्या हुइल बा । स्थानीयवासी हिउँ पगालके पानी पिये परल अवस्था आइल उहाँ बटैलै ।
