कञ्चनपुर प्रशासनसे बार अनुसार सेवा

पहुरा समाचारदाता
कञ्चनपुर, १४ माघ । कोभिड–१९ के संक्रमणहे मध्य नजर करटी जिल्ला प्रशासन कार्यालय कञ्चनपुर यिहे माघ १६ गतेसे (अँटवार) बार अनुसार सेवा प्रदान सुरु कैना जनैेले बा ।

कोभिड–१९ संक्रमणके कारण यी कार्यालयसे अत्यावश्यक बाहेकके सेवा प्रवाह बन्द रहलमे कोरोना संक्रमणके जोखिम कायमे रहल सन्दर्भमे अँटवारसे बार अनुसार सेवा सुचारु करे लागल प्रमुख जिल्ला अधिकारी रामप्रसाद पाण्डे जनैलै ।

प्रशासन कार्यालयसे नयाँ नागरिकताके लाग सेवा प्रवाह करेक लाग अँटवार ओ सोम्मारके रोज वेदकोट नगरपालिका, कृष्णपुर नगरपालिका ओ पुनर्वास नगरपालिकाके स्थानीय सेवा लेहे सेक्ना बा ।

मंगर ओ बुधके रोज दोधाराचाँदनी नगरपालिका, शुक्लाफाँटा नगरपालिका ओ बेलडाँडी गाउँपालिकासे सेवा लेहे पैना कहले बा । ओस्टेक विफे ओ शुकके रोज भीमदत्तनगरपालिका, बेलौरी नगरपालिका ओ लालझाँडी गाउँपालिकाके सेवाग्राही सेवा लेहे सेक्ना प्रमुख जिल्ला अधिकारी पाण्डे बटैलै ।