नुक्लिपुरके भलमन्सामे पुनः हिंगुराम चौधरी

पहुरा समाचारदाता
धनगढी, १४ माघ । कैलालीके गौरीगङ्गा नगरपालिका–१०, नुक्लीपुर गाउँके भलमन्सामे पुनः हिंगुराम चौधरी चयन हुइल बाटै । शुकके हुइल उ गाउँके भुरा खेल (भेला) से चौधरीहे डुसरा कार्यकालके लाग भलमन्सा चयन करल हो ।

ओस्टके, अघरियामे सागर चौधरी ओ कोषाध्यक्षमे चेतराज चौधरी चयन हुइल बाटै । गाउँवासीके भेलासे सुनिल चौधरी ओ महेश चौधरीहे भन्सरिया (गाउँवासीके खानपानके बेला खाना पकुइया) चयन करल बा ।

माघ टिहुवारपाछे थारु समुदायमे भलमन्सा चयनके कार्य चल्टी रहल बा । इ समुदाय परम्परागत भलमन्सा प्रथासे चल्टी आइल बा । भलमन्सा गाउँके नेतृत्व करुइया व्यक्ति हुइट ।

भलमन्सा गाउँमे विकास निर्माणके कार्यसे लेके भोजभतेरमे नेतृत्वदायी भूमिका निर्वाह कैना, सामान्य झैझगडा, विवाद मिलैना जैसिन काम कैना करठै ।