सुदूरपश्चिम प्रदेशमे ४८६ संक्रमित ठप्लै, २ के मृत्यु
पहुरा समाचारदाता
धनगढी, १४ माघ । सुदूरपश्चिम प्रदेशमे शुकके रोज ४ सय ८६ जाने कोरोना संक्रमित ठपल बटै ।
आरटी पीसिआर ओ एन्टी जेनके १६ सय ९३ जानेक कोरोना परिक्षण करेबेर ४८६ जाने संक्रमित ठपल सामाजिक विकास मन्त्रालय सुदूरपश्चिम प्रदेश स्वास्थ्य निर्देशनालय जनैले बा ।
पछिल्का २४ घण्टामे २५७ जाने कोरोना मुक्त हुइल मन्त्रालय जनैले बा कलेसे शुकके रोज बर्दगोरिया गाउँपालिका–४ कैलालीके ७५ बरसके एक पुरुष ओ भीमदत्त नगरपालिका–१ कञ्चनपुरके ७५ बरसके एक पुरुष करके दुई जानेक मृत्यु हुइल बा ।
प्रदेशमके आरटी पीसिआरके २ हजार ५५ जाने ओ एन्टीजेनके २९ सय २७ जाने करके ४ हजार ९ सय ८२ जाने सक्रिय संक्रमित बटै । प्रदेशमे अभिनसम ६२१ जानेक ज्यान गैल बा ।
शुकके रोज सुदूरपश्चिम प्रदेशके टमान नाकासे ९०७ जाने नेपाल भिटरेबेर ६ जनहनमे कोरोना संक्रमण डेखल बा । जेम्ने गौरीफन्टा नाकासे ३९ जाने, गडडाचौकीसे ४२५, जुलाघाटसे ५८, पुलघाटसे २६ जाने नेपाल प्रवेश करले बटै ।
ओस्टेक पछिल्का २४ घण्टामे देशभर ६८२७ जनहनमे कोरोनाभाइरस संक्रमण पुष्टि हुइल बा कलेसे १० जानेक मृत्यु हुइल बा । स्वास्थ्य तथा जनसंख्या मन्त्रालयके अनुसार उ अवधिमे १९ हजार ८६९ ठो नमुना परीक्षण हुइल रहे ।
मन्त्रालयसे २४ घण्टाके अवधिमे ठिक हुइलके संख्याफे ५ हजार ४३२ जाने रहल बा । यी संगे देशभर कोरोनाके सक्रिय संक्रमितके संख्या ८९ हजार ९४१ जाने कायम हुइल बा ।
