बरघरहे वातावरण संरक्षणमे अग्रसर बनैटी
पहुरा समाचारदाता
टीकापुर, १५ माघ । कैलाली जिल्लामे बरघर प्रथा कायमे रहल बा । समाजसेवा कैना भरपर्दो माध्यमके रुपमे बर्सौसे चलनमे रहल बरघर प्रथा समाज विकाससँगे सामािजक न्यायके क्षेत्रमे समेत सकारात्मक अभ्यास करटी रहल बा ।
पाछेक कुछ बरस यहोर बरघरके भूमिका ओ कार्यमे परिमार्जन करे लागल रलेसे फेन कृषिसँग जोरल गतिविधि सञ्चालन ओ ग्रामीण विकासमे बरघरके भूमिका सम्झनलायक रहल बा ।
पाछेक समय बरघरहे वातावरण संरक्षणके क्षेत्रमा समेत स्थानीय सरकार परिचालन करे लागल बा । वातावरण संरक्षणमे बरघरहुक्रनके भूमिका अहम रहल बा । इ भूमिकाहे थप जिम्मेवार बनैना कैलालीके टीकापुर नगरपालिका बरघरसँग छलफल समेत करले बा । नगरपालिकासे बरघरहे वातावरण संरक्षणमे समुदायहे सचेत बनैना सहयोग होए कहिके ऐनमे रहल ब्यवस्थाबारे समेत जानकारी डेहे लागल बा ।
घर अंगनाकिल सफा कैके किल नैहुइ, मनै निरोगी रहिट, बैठ्ना वातावरण नै सफा ओ स्वच्छ हुइ परल । टीकापुर नगरपालिका वडा नंं ५ मनिकापुरके बरघर लक्ष्यबहादुर चौधरी डगराम गैयाभैँस बाँध्ना कारणसे बस्ती सरसफाईमे समस्या हुइना करल बटैठै ।
बरघर लक्ष्यबहादुर नगरपालिका वातावरण सरसफाइके लाग रुख्वा बरिख्वा लगैना जागरुक बनैना, गाउँ टोल सफा रख्ना गाउँके मनैनहे जिम्मेबार बनैना आग्रह करल ओरसे आब खोज्नीबोज्नीमे इ सक्कु विषयमे छलफल कैना बटैलै ।
टीकापुर ४ बाघमाराके बरघर तुलाराम चौधरी गाउँमे रहल क्लवके युवाहुक्रनसे सडक सरफाई कैना, सडकमे गैयाँभैँस बाँधे नैडेना कार्य कैटी रलेसे फेन अइना दिनमे नगरपालिकासे सरसफाई, वृक्षारोपण जैसिन कार्यमे सहयोग कैलेसे मजना हुइना बटैलै ।
टीकापुर नगरपालिकाके वातावरण तथा सरसफाई उपशाखा प्रमुख निर्मला चौधरी वातावरण सरसफाई तथा संरक्षणके लाग हरियाली वृद्धि, सडक किनारके वृक्षारोपण संरक्षण ओ सरसफाई अभियानहे सहयोग कैना ओ फोहोर व्यवस्थापनमे सक्रिय कराइक लाग ९ वडाके बरघरहे अभिमुखिकरण करल बटैली ।
