संक्रमितसे ठिक हुइना दर ढेर
पहुरा समाचारदाता
धनगढी, १५ माघ । सुदूरपश्चिम प्रदेशमे दुई दिन यहोर कोरोना मुक्तदर उच्च डेखल बा । कलेसे शनिच्चरके रोज संक्रमितसे ठिक हुइना दर ढेर हुइल बा ।
सामाजिक विकास मन्त्रालय सुदूरपश्चिम प्रदेश स्वास्थ्य निर्देशनालयसे डेहल जानकारी अनुसार पछिल्का २४ घण्टामे कैगिल परिक्षणमे २ सय ६९ जनहनमे कोरोना संक्रमण पुष्टि हुईबेर यिहे अवधिमे २ सय ९९ जाने चोखाइल हुइट ।
शनिच्चरके रोज ९ सय ४१ जानेक एन्टीजेन विधिसे कोरोना परिक्षण करेबेर १ सय ४५ जनहनमे संक्रमण पुष्टि हुइल हो । कलेसे २ सय २८ जानेक आरटी पीसिआर विधिसे परिक्षण करेबेर १ सय २४ जनहनमे कोरोना संक्रमण पुष्टि हुइल मन्त्रालय जनैले बा । शुकके प्रदेशमे ४ सय ८६ जनहनमे संक्रमण पुष्टि हुइलबेर २ सय ५७ जाने कोरोना मुक्त हुइल रहिट ।
सुदूरपश्चिम प्रदेशमे आठ ठाउँके प्रयोगशालासे आरटी पीसिआर परिक्षण कैजैटी रहल बा । कलेसे सबसे ढेर सेती प्रादेशिक अस्पतालके प्रयोगशालासे कोरोना परिक्षण हुइटी रहल मन्त्रालय जनैले बा । शनिच्चरके रोज यहाँ २ सय ८ जानेक परिक्षण करेबेर १०९ जनहनमे कोरोना संक्रमण पुष्टि हुइल बा । ओस्टेक डडेल्धुरा अस्पतालमे १७ जनहन मन्से १४ मे, कमल बजार अस्पतालमे ३ जनहन मन्से १ जनहनमे संक्रमण पुष्टि हुइल बा । और प्रयोगशालासे कोरोना परिक्षण करल नइहो ।
पीसिआर परिक्षणसे शनिच्चके रोज ठपल १२४ मे सबसे कैलालीके १ सय ९ जाने, डडेल्धुराके १२ जाने, कञ्चनपुरके ४, बैतडीके २ जाने ओ अछाम दार्चुलाके एक/एक जाने रहल बटै । ओस्टेक एन्टीजेन परिक्षणसे ठपल १ सय ४५ जनहन मन्से कञ्चनपुरके ३८ जाने, कैलालीके ३६ जाने, बैतडीके ३१ जाने, अछामके १९ जाने, बझाङके १३ जाने ओ बाजुराके ८ जाने रहल बटै ।
मन्त्रालयके अनुसार प्रदेशमे अब्बे पीसिआरके १ हजार ९ सय ८० जाने सक्रिय संक्रमित रहबेर सबसे ढेर कैलालीके १ हजार ३ सय ७६ जाने, कञ्चनपुरके ३ सय १७ जाने, अछाममे ३७, बैतडीमे ७२, बझाङमे ११, बाजुरामे ६३, डडेल्धेरमे ८१, दार्चुलामे २ डोटीमे ८ जाने केल रहल बटै । ओस्टेक एन्टीजेन परिक्षणसे डेखल सक्रिय संक्रमितके संख्य २ हजार ९ सय ५० जाने रहल बा । जेम्ने सबसे ढेर कैलालीके १ हजार ७८ जाने, कञ्चनपुरके ७ सय ९५ जाने, डोटीमे २ सय ५७ जाने, दार्चुलाके ८४ जाने, डडेल्धुराके १ सय ९७, बाजुराके १ सय ८३, बझाङके १ सय ३२ जाने, बैतडीके १ सय ३४ ओ अछाममे ९० जाने रहल बटै ।
शनिच्चरके रोज सुदूरपश्चिमके टमान नाकासे ८ सय ७३ जाने नेपाल भिटरल बटै कलेसे ओइनके एन्टीजेन विधिसे कोरोना परिक्षण करेबेर ८१ जनहनमे संक्रमण पुष्टि हुइल मन्त्रालय जनैले बा ।
कञ्चनपुरके गडडाचौकी नाकासे ४ सय ५४ आइबेर ३८ मे, कैलालीके गौरीफन्टा नाकासे ३ सय ४१ जाने आइबेर ३४ जाने, बैतडीके जुलाघाटा नाकासे ७८ जाने आइबेर ९ जनहनमे संक्रमण डेखल बा । ओस्टेक अब्बेसम टमान नाका मार्फत नेपाल भिटरल २ लाख २ हजार ७ सय २८ जानेक एन्टीजेन विधिसे कोरोना परिक्षण करेबेर ६ हजार ७ सय ६२ जनहनमे कोरोना संक्रमण डेखल रहे ।
प्रदेशमे हालसे एन्टीजेन ओ आरटी पीसिआर विधिसे ४ लाख ७४ हजार ४ सय ५१ जानेक कोरोना परिक्षण करेबेर ५७ हजार ६६ जनहनमे कोरोना पोजेटिभ ओ ४ लाख १७ हजार ३ सय ८५ जनहनमे निगेटिभ रिपोर्ट आइल मन्त्रालय जनैले बा । ओस्टेक प्रदेशमे अब्बे ६ सय २१ जाने कोरोना संक्रमण पुष्टि हुइल मनै ज्यान गुमैले बटै ।
ओस्टेक देशभर थप ४ हजार ९०४ जनहनमे कोरोना भाइरसके संक्रमण पुष्टि हुइल बा । १४ हजार ५६२ जानेक कोरोना परीक्षण करेबेर पीसीआर विधिसे ३ हजार ३१८ तथा एन्टिजेन विधिसे १ हजार ५८६ जनहनमे संक्रमण पुष्टि हुइल हो ।
यिहे अवधिमे थप ५ हजार ९२४ जाने संक्रमणमुक्त हुइल बटै । टिसरा लहर सुरु हुइल यहोर पहिल चो संक्रमिके सख््यासे ढेर ठिक हुइलके सख््या रहल बा । हालसम नेपालमे कूल संक्रमित मन्से ८ लाख ४८ हजार ३६० जाने संक्रमणमुक्त हुसेकल बटै । नेपालमे ठिक हुइल दर ८९.५ प्रतिशत रहल बा ।
यी संगे सक्रिय सक्रमितके सख्या घटके ८७ हजार ३२९ मे पुगल बा । स्वास्थ्य तथा जनसख्या मन्त्रालयके अनुसार पछिल्का २४ घण्टामे थप ६ जाने ज्यानफे गुमैले बटै । नेपालमे हालसम कोभिड–१९ के संक्रमणसे ११ हजार ७०३ जाने ज्यान गुमासेकल बटै ।
मन्त्रालयके अनुसार थप २ लाख ७२ हजार ७४८ जनाने कोभिड–१९ विरुद्धके खोपफे लगैले बटै । हालसम १ करोड ६५ लाख २७ हजार ७४१ जाने पहिल मात्रा, १ करोड ४० लाख १५ हजार ३२४ जाने दुसरा मात्रा ओ ३ लाख ३३ हजार ८३५ जाने अतिरिक्त मात्रा खोप लगासेकल बटै ।
