कैलालीमे ६५ प्रतिशतहे पूर्ण खोप

पहुरा समाचारदाता
धनगढी, १८ माघ । कैलालीमे लक्षित उमेर समूहके ६५ प्रतिशत नागरिक कोरोनाविरुद्धके पूर्ण खोप लगैले बाटै । खोपके पहिल मात्रा लगुइयाके संख्या भर ७१ प्रतिशत पुगल बा । स्वास्थ्य कार्यालय कैलालीके अनुसार कैलालीमे कोरोनाविरुद्धके खोप लगुइया लक्षित उमेर समूह १८ बरसउपरके जनसंख्या छ लाख ६४ हजार ६८८ रहल बा ।

जौन मध्ये चार लाख ७१ हजार ९२८ जाने खोपके पहिल मात्रा ओ चार लाख ३२ हजार जाने खोपके पूर्ण मात्रा लगाइल जिल्ला स्वास्थ्य कार्यालय कैलालीके प्रमुख लालबहादुर धामी जानकारी डेलै । ‘खोप लगुइयाके संख्या बह्रटी गैल बा । हम्रे खोपके कार्यक्रम नियमितरूपमे करटी रहल बाटी,’ धामी कहलै, ‘कैलाली कोरोना संक्रमणके उच्च जोखिममे रहल ओरसे फेन यहाँ नियमित खोप कार्यक्रम हुइटी रहल बा । नागरिक अनिवार्य खोप लगाइ परठ् कनामे समेत सचेत हुइल बाटै ।’

कैलाली जिल्लामे सोम्मारसे १२ से १७ बरस उमेर समूहके बालबालिकाहे फेन मोडर्ना खोप लगैना काम सुरु करले बा । जिल्लामे रहल एक लाख २० हजार बालबालिकाहे खोप लगैना हुइल बा । बालबालिकाहे खोप लगाइक लाग अब्बे एक लाख ११ हजार डोज खोप जिल्लामे आइल बा कलेसे उहे अनुसार खोप अभियान सञ्चालन करल प्रमुख धामी बटैलै । ‘बालबालिकाके संख्यासे कुछ मात्रा कम खोप आइल बा । हम्रे थप माग करले बाटी,’ धामी कहलै, ‘सक्कु बालबालिकाहे समयमे खोप लगैना सुरु करल बा ।’

कैलालीके टीकापुर नगरपालिका फेन मंगरसे १२ से १७ बरस उमेर समूहके १७ हजार बालबालिकाहे खोप लगैना सुरु करले बा । १८ गतेसे २१ गतेसम नगरपालिकाके टमान स्थानमे खोप केन्द्र स्थापना कैके बालबालिकाहे खोप लगैना तयारी हुइटी रहल टीकापुर नगरपालिका जनस्वास्थ्य प्रवद्र्धन उपशाखाके सहसंयोजक कमल रावल जानकारी डेलै । ‘हरेक विद्यालय ओ पायक पर्ना टमान स्थानमे खोप केन्द्र राखके विद्यालय तथा समुदायमे रहल बालबालिकाहे खोप लगैटी बाटी,’ रावल कहलै, ‘खोप लगैना कहलपाछे अभिभावक ओ शिक्षक खुशी हइल बाटै । लम्मा समयसे बालबालिकाहे खोप माग कैटी आइल अभिभावक तथा शिक्षकके मागसमेत पूरा हुइल बा ।’

टीकापुर नगरपालिकामे १८ बरस उप्परके ८१ प्रतिशत नागरिकहे पहिल मात्रा ओ ६६ प्रतिशत नागरिकहे पूर्ण मात्रा खोप लगासेकल रावल बटैलै । ओस्टके कैलालीके जानकी गाउँपालिका फेन मंगरसे २१ गतेसम पालिकाभिट्टर रहल तीन हजार ९४५ बालबालिकाहे खोप लगैना तयारी करल गाउँपालिका स्वास्थ्य शाखा प्रमुख जीतबहादुर चौधरी जानकारी डेलै । ‘कोरोना महामारी समुदायमे फैलल्पाछे पुसके अन्त्यसे बन्द हुइल यहाँके विद्यालय खोप लगाइलपाछे खुल्ना आशा सक्कु जनहनमे रहल बा,’ चौधरी कहलै, ‘बालबालिकाके सुरक्षा ओ शैक्षिक गतिविधि सञ्चालनके लाग फेन खोप आवश्यक रहे । हम्रे खोप अइटी किल सुरु करल हुइटी ।’

कैलालीके सक्कु जैसिन पालिकामे इहे अँठ्वारभित्रे खोप अभियान सञ्चालन हुइना हुइल बावै । अभिभावक खोप अभियान सञ्चालन हुइ लागलमे खुशी हुइल बाटै । विद्यालयसे बालबालिकाहे सूचना कैके अनिवार्य खोप लगैना आग्रह करले बाटै । ‘लम्मा समयसे पह्राइ नैहोके बालबालिका गाउँमे सडकमे खेल्टी रहिट, कुछ बालबालिका टेलिभिजन ओ मोबाइलमे ब्यस्त रहिट,’ शिक्षक पूर्ण विक कहलै, ‘खोपपाछे विद्यालय नियमित हुइलेसे बालबालिकाके शैक्षिक विकासमे असर नैपरी ।’