प्रदेशमे ठप २४६ हे संक्रमण पुष्टि
पहुरा समाचारदाता
धनगढी, १८ माघ । सुदूरपश्चिम प्रदेशमे पछिल्का २४ घण्टामे ठप २ सय ४६ जनहनमे कोरोना भाइरसके संक्रमण पुष्टि हुइल बा ।
सामाजिक विकास मन्त्रालय सुदूरपश्चिम प्रदेश स्वास्थ्य निर्देशनालयसे डेहल जानकारी अनुसार एक हजार एक सय ४२ जनहनके कोरोना परिक्षण करेबेर २ सय ४६ जाने संक्रमित ठपल हुइट । एन्टीजेन विधिसे ९ सय २८ जानेक परिक्षण करेबेर १ सय ५८ मे ओ आरटी पीसिआर विधिसे २ सय १४ जानेक कोरोना परिक्षण करेबेर ८८ जनहनमे संक्रमण पुष्टि हुइल मन्त्रालय जनैले बा ।
यिहे अवधिमे १ सय ८८ जाने कोरोना मुक्त हुइल बटै कलेसे एक जाने कैलालीके धनगढी उपमहानगरपालिका–५ निवासी ५५ बरसके एक जाने पुरुषके कोभिड संक्रमणके कारण भेन्टीलेटरमे उपचारके क्रममे सेती प्रादेशिक अस्पतालमे मृत्यु हुइल बा ।
प्रदेशमे हालसम ६ सय २४ जानेक मृत्यु हुसेकल बा । प्रदेशमे अब्बे आरटी पीसिआरके १ हजार ६ सय ३८ ओ एन्टीजेनके २ हजार ८ सय ६८ करके ४ हजार ५ सय ६ जाने कोरोना सक्रिय संक्रमित रहल बटै ।
मंगरके रोज सुदूरपश्चिम प्रदेशके टमान नाकासे ६ सय ६२ जाने नेपाल लौटलमे ३४ जनहनमे कोरोना संक्रमण पुष्टि हुइल बा ।
जेम्ने कैलालीके गौरीफन्टा नाकासे २ सय ७६ जाने, कञ्चनपुरके गडडाचौकी नाकासे ३ सय ६० जाने, बैतडीके जुलाघाटसे १८ जाने ओ दार्चुलाके पुलघाटसे ८ जाने नेपाल भिटरल बटै ।
थप ६१ जनहनमे कोरोना पुष्टि
कैलालीके सेती प्रादेशिक अस्पतालके प्रयोगशालामे हुइल परीक्षणमे मंगरके ६१ जनहनमे कोरोना पुष्टि हुइल बा । पाछेक २४ घण्टामे १७१ नमुना परीक्षण करेबर ६१ जनहनमे संक्रमण पुष्टि हुइल अस्पतालके सूचना अधिकारी दिलीपकुमार श्रेष्ठ जानकारी डेलै ।
ओस्टके सेतीमे उपचाररत धनगढीके एक कोरोना संक्रमितके मृत्यु हुइल बा । सोम्मारके धनगढी उपमहानगरपालिका–५ के ५५ वर्षीय पुरुषके सेती प्रादेशिक अस्पतालमे मृत्यु हुइल हो । उहाँ दम सम्बन्धी बिरामी रहल ओ सोम्मारके ओहकानमे कोरोना संक्रमण पुष्टि हुइल बटाइल बा ।
ओस्टके २४ घण्टामे ३ जाने लावा कोरोना संक्रमित अस्पताल भर्ना हुइल बाटै । कलेसे, ५ जाने संक्रमित चोखाके अस्पतालसे डिस्चार्ज हुइल बाटै । हाल अस्पतालमे २१ जाने संक्रमित विरामीके उपचार हुइटी रहल बा । उ मध्ये ८ जनहनके आइसियूमे ओ २ जनहनके भेन्टिलेटरमे उपचार हुइटी रहल बा ।
