कोभिडके कारण स्थगित लोकसेवाके परीक्षा फागुन ७ से

काठमाडौं, २० माघ । कोभिड–१९ के संक्रमणके कारण स्थगित हुइल लोकसेवा आयोगके परीक्षा फागुन ७ गतेसे सञ्चालन हुइना हुइल बा । आयोगके बुधके रोज बैठल बैठकसे यीआघे महामारीके कारण स्थगित हुइल परीक्षा फागुन ७ गतेसे सञ्चालन करना निर्णय करल हो ।

संक्रमण तीव्र गतिमे फैलल कारण यीआघे ६ माघमे आयोगसे परीक्षा तालिका निर्धारण होसेकल टमान तहके परीक्षा स्थगित करले रहे ।

आयोग आब पूर्वनिर्धारित उ परीक्षा स्वास्थ्य सुरक्षाके मापदण्ड अपनाके करना हुइल हो ।

आयोगसे उपसचिव वा ओहे सरह (अप्राविधिक/प्राविधिक), शाखा अधिकृत वा ओहे सरह (प्राविधिक) ओ स्वास्थ्य सेवाओर नवौँ, आठौँ ओ सातौँ तहके टमान परीक्षाके कार्यतालिके समेत प्रकाशित करले बा ।