सुदूरपश्चिम प्रदेशके बजेट खर्च न्यून
पहुरा समाचारदाता
धनगढी, २५ माघ । सुदूरपश्चिम प्रदेश सरकारसे चालु आर्थिक बरसके लाग विनियोजित बजेट मध्ये छ महिनाके अवधिमे १३.३३ प्रतिशत बजेटमात्र खर्च करले बा ।
सरकारसे बजेटमे समावेश करल अधिकांश योजना कार्यान्वयनमे नैजाके बजेट खर्च न्यून हुइल हो । विकासे अड्डाके बजेट खर्च न्यून रहल बा ।
सरकारके ढिउर जैसिन योजना कार्यान्वयनके लाग आभिन सम्झौता हुइ सेकल नैहो । छ महिनाके अवधिमे चालू खर्च २०.०९ प्रतिशत होके पूँजीगत खर्च ८.६८ प्रतिशत किल रहल बा । पूँजीगत ओकरे करिब १८ अर्ब १० करोड ३० लाख बजेटमध्ये छ महिनामे करिब एक अर्ब ५७ करोड २० लाख किल खर्च हुइल बा ।
सबसे ढिउर बजेट रहल भौतिक पूर्वाधार विकास मन्त्रालय ओ मातहत निकायमे रहल बा । मने भौतिकके ११ अर्ब ८३ करोड ४४ लाखमध्ये एक अर्ब १६ करोड ७१ लाख (९.८६ प्रतिशत) किल खर्च हुइल बा । उ मन्त्रालयसे चालु ओर भर ३८.२६ प्रतिशत बजेट खर्च करले बा ।
प्रदेशके सात मन्त्रालयमध्ये तुलनात्मक रुपमे ढिउर बजेट रहल भूमि व्यवस्था, कृषि तथा सहकारी मन्त्रालय मातहतके निकायके खर्च फेन न्यून रहल बा । इ मन्त्रालयसे दुई अर्ब ८४ करोड ४७ लाखमध्ये ३४ करोड ३५ लाख बजेट किल खर्च करल प्रदेश लेखा नियन्त्रण कार्यालय जनैले बा ।
विकासे मन्त्रालयके रुपमे रहल सामाजिक विकास मन्त्रालय ओ उद्योग, पर्यटन, वन तथा वातावरण मन्त्रालयके खर्च तुलनात्मक रुपमे ढिउर डेखगैलेसे फेन समग्रमे कम रहल बा ।
उद्योगसे २०.५८ प्रतिशत ओ सामाजिकसे २०.६२ प्रतिशत बजेट खर्च करले बा । इ दुई मन्त्रालयके बजेट क्रमशः दुई अर्ब १८ करोड ८९ लाख ओ छ अर्ब पाँच करोड ५६ लाख रहल बा ।
प्रदेश लेखा नियन्त्रण कार्यालयके तथ्यांकअनुसार आर्थिक मामिला मन्त्रालयसे छ महिनाके अवधिमे कुल बजेटके साढे १० प्रतिशत, आन्तरिक मामिला तथा कानुन मन्त्रालयसे १५.२६ प्रतिशत ओ मुख्यमन्त्री कार्यालयसे ४.०८ प्रतिशत खर्च करले बावै ।
सरकारसे चालु आर्थिक बरसके ३० अर्ब ३३ करोडके बजेटमध्ये छ महिनामे चार अर्ब सात करोड खर्च करल हो । गत आर्थिक बरसमे सरकारसे करिब ७० प्रतिशत बजेट खर्च करल रहे । थप अवधिमे विकास निर्माणके कामहे तीव्रता नै डेहे सेक्लेसे इ बरस कुल खर्च गैल बरससे कम हुइना अनुमान करल बा ।
प्रदेशके आर्थिक मामिला मन्त्रालयसे पूँजीगत खर्च बह्रैना मन्त्रालयके सचिवनहे घचघच्याइना काम करटी रहल जनाइल बा । मन्त्रालयके प्रवक्ता उपसचिव तुलसीप्रसाद भट्टराइ पूँजीगत खर्च न्यून रहल बटैल । ‘प्रगति न्यून रहल बा । बजेट खर्चमे बाढाअड्काउ हुइलेसे हम्रे फुकैना
तयार बाटी, बजेट खर्च बह्राइ परल कहिके आर्थिक मामिला मन्त्रालयसे अन्य मन्त्रालयहे घचघच्याइटी रहल बा,’ उहाँ कहलै ।
योजना ठेक्का प्रकृयामे जासेकल ओरसे आब खर्च बह्रना जवाफ मन्त्रालयसे अइना करल भट्टराइ बटैलै । प्रशासनिक ओ प्रकृयागत कारणसे सुरुमे बजेट खर्च कम हुइना करल उहाँके कहाइ रहल बा । ‘सरुवा–बढुवा हुइना हुइल ओरसे साउन–भदौओर कर्मचारी फेन काममे ढिउर अग्रसर नैहुइठै,’ प्रवक्ता भट्टराइ कहलै, ‘ठेक्का प्रकृया फेन कुछ समय लेहठ् ।’
