सुदूरपश्चिममे २६ संक्रमित ठप्लैं
पहुरा समाचारदाता
धनगढी,११ फागुन । सुदूरपश्चिम प्रदेशमे २६ जाने कोरोनाके संक्रमित ठपल बटैं ।
सामाजिक विकास मन्त्रालय स्वास्थ्य निर्देशनालय डोटीसे डेहल जानकारी अनुसार पछिल्का २४ घण्टामे १ हजार १० जाने कोरोना परिक्षण करेबेर २६ जनहनमे संक्रमण पुष्टि हुइल हो । एन्टीजेन विधिसे ९ सय ४५ जानेक परिक्षण करेबेर १३ ओ आरटी पीसिआर विधिसे ६५ जानेक परिक्षण करेबेर १३ करके २६ जनहनमे संक्रमण पुष्टि हुइल जनागिल बा । बुधके १५ जाने चोखाइल बटै ।
प्रदेशमे अब्बे आरटी पीसिआरके ७१ ओ एन्टीजेनके ७ सय ८३ करके ८ सय ५४ जाने सक्रिय संक्रमित रहल बटै । जेम्ने कैलालीमे सबसे ढेर ६ सय १६ जाने सक्रिय संक्रमित रहल बटै । बुधके रोज प्रदेशके टमान नाकासे १ हजार ४४ जाने नेपाल भिटरेबेर ६ जनहनमे संक्रमण डेखल बा ।
ओस्टेक करके पछिल्का २४ घण्टामे देशभर ३१२ जनहनमे कोरोनाभाइरस संक्रमण पुष्टि हुइल बा । कुल ८ हजार ६९३ जनहनमे कोरोना परीक्षण करेबेर उ संख्यामे संक्रमण पुष्टि हुइल हो ।
ओस्टेक पछिल्का २४ घण्टामे ९११ जाने ठिक हुइल बटै । पछिल्का २४ घण्टामे २ जाने कोरोना संक्रमितके मृत्यु हुइल बा । हाल देशभर १० हजार ९० जाने सक्रिय संक्रमित रहल बटै ।
