कुटपिट पश्चात मृत्यु घटनामे संलग्न अभियुक्त पक्राउ
पहुरा समाचारदाता
धनगढी, ११ फागुन । कुटपिट पश्चात मृत्यु घटनामे संलग्न दुई अभियुक्त पक्राउ परल बटै । पक्राउ परलमे कैलालीके भजनी न.पा. ०९ बैठना दिनेश बिष्ट ओ लक्ष्मण बराल रहल बटै ।
यिहे फागुन ७ गते जिल्ला कैलाली भजनी नगरपालिका वडा नं. ०९ स्थित भोजहा कार्यक्रममे नाचगान कैना क्रममे एक आपसमे बिवाद हुके झै–झगडा एवं कुटपिट हुईबेर बर्ष २६ के बसन्त चौधरी घाहिलके उपचारके मुत्यु हुइल रहे ।
घाहिल बसन्तहे घोडाघोडी अस्पताल सुख्खड कैलालीमे सामान्य उपचार पश्चात थप उपचारके लाग कोहलपुर मेडिकल कलेजमे रिफर करदमे उपचारके क्रममे हुकान यिहे फागुन ८ गते मृत्यु हुइल रहे ।
घटनामे संलग्न मन्से उ व्यक्तिहुकनहे नियन्त्रणमे लेके कर्तव्य ज्यान मुद्दामे म्याद थप करके आवश्यक कारवाही प्रक्रिया आघे बढाइल जिल्ला प्रहरी कार्यालय कैलाली जनैले बा । कलेसे घटनामे संलग्न और व्यक्तिहुकनके खोजी कार्य हुइटी रहल बा ।
