शारदा ओ स्टेपिङ विजयी

पहुरा समाचारदाता
धनगढी, ११ फागुन । धनगढी मेयर लिटल फ्लावर प्रिमियर लिग–६ अन्तरगत बुधके हुइल दुई खेलमे शारदा सरस्वती ओ स्टेपिङ स्टोन विजयी हुइल बटै । जिटसंगे शारदासे सेमिफाइनल प्रवेशके सम्भावना कायमे राखल बा । सैनिक समूह चरणके सक्कु खेल हरटी प्रतियोगितासे बाहेरल बा । स्टेपिङके फे यी सान्त्वना जित हो कलेसे सत्यवती सेमिफाइनल प्रवेश करसेकल बा ।

बुधके हुइल पहिल खेलमे कञ्चनपुरके शारदा सरस्वती दोधारासे सैनिक आवासीय महाविद्यालय तेघरीउप्पर १ सय रनके सानदार जित दर्ता करले बा । टस जिटके ब्याटिङ कैना निर्णय करल शारदा निर्धारित २० ओभरमे ७ विकेट गुमाके १ सय ७० रन बनाइल । १ सय ७१ रनके विशाल विजयी लक्ष पछ्याइल सैनिक १५ ओभरमे अपन सक्कु विकेट गुमाके ७० रन केल बनाई सेकल । ओकर खडक बोहरा २७ ओ प्रज्वल थापा १७ रन बनैना बाहेक और ब्याट्सम्यान शारदाके बलर सामु टिके नइसेकल । सैनिकहे सस्तामे समेट्न शारदाके विकास सुनारसे ५ विकेट लेलै । अर्जुन सिंह साउद ३, मिलन बोहरा २ विकेट लेलै ।

यी आघे शारदाके लाग आक्रमक पारी खेलल राजेश साउद २२ बलमे ५ चौका ओ ३ छक्काके मद्दतसे ४५ रनके पारी खेल्लै । ओकर सुनिल चन्द ४१, कप्तान गणेश बिटालु २७, सागर चन्द २० रन बनाके आउट हुईबेर हेमन्त धामी ११ रनमे अविजित रहलै । सैनिकके खडक बोहरा ३ ओ आकाश चन्द २ विकेट लेलै ।

खेलके प्लेयर अफ दी म्याच विकास सुनार घोषित हुइलै । गेम चेन्जर अवार्ड अर्जुन सिंह साउद पाईबेर, सर्वाधिक छक्काके अवार्ड राजेश साउद ओ सुनिल चन्द पैलै ।

बुधके हुइल दुसरा खेलमे स्टेपिङ स्टोनसे सत्यवती उप्पर ३० रनके सान्त्वना जित निकरना सफल हुइल । टस जिटके ब्याटिङ कैना निर्णय करल स्टेपिङसे निर्धारित २० ओभरमे ६ विकेट गुमाके १ सय ५७ रन बनाइल रहे । १ सय ५८ रनके विजयी लक्ष पछ्याइल सत्यवती १८.४ मे १ सय २७ रन केल बनाई सेकल । ओकर लाग आदील अन्सारी २५, सन्तोष कार्की २४, खगेन्द्र जोशी २२, सुजन गौतम १६, नीरज भट्ट १२ रन बनैना बाहेक और ब्याट्सम्यानके प्रदर्शन मजा रहे नइसेकल । बलिङ ओर स्टेपिङके दिनेश ओड ४, कपिल मिश्र, भुपेश जोशी, वीरेन्द्र चन्द समान २÷२ विकेट लेलै ।

यी आघे स्टेपिङके लाग अभिषेक कुवँर ४१ बलमे ५ छक्का ओ ४ चौका प्रहार करटी ६५ रनके उत्कृष्ट पारी खेल्लै । दिनेश ओड २९, वीरेन्द्र चन्द २१, आर्यान दानपालीसे १९ ओ विशाल विष्ट ११ रन बनैलै । बलिङओर सत्यवतीके नीरज भट्ट ओ सन्दीप खत्रीसे समान २÷२ विकेट लैलै ।

खेलके प्लेयर अफ दी म्याच अभिषेक कुँवर हुइलै । गेम चेन्जर अवार्ड दिनेश वडसे पाके सर्वाधिक छक्काके अवार्डफे अभिषेक पैलै ।
सत्यवती यी आघे सेमिफाइनलमे प्रवेश करसेकल बा कलेसे स्टेपिङ उपाधि होडसे बाहेर सेकल टिम हो ।

समूह चरणके अन्तिम खेलमे काल्ह सकारे बिहान ९ः३० बजे काठमाण्डौँके हिमालयन ह्वाइट हाउस स्कुल ओ होलिल्याण्ड स्कुल अत्तरिया प्रतिस्पर्धा करही । आजके खेल जिटल खण्डमे होलिल्याण्ड सेमिफाइनल प्रवेश करी । हिमालयन ह्वाइट हाउस, सत्यवती ओ विद्या भूषण यी आघे सेमीफाइनल प्रवेश करसेकल बा ।

एलपीएलके जारी संस्करणके उपाधि विजेता १ लाख ५० हजार ओ उप–विजेता ७५ हजार पुरस्कार राशि पैही ।