गोपाल हमाल डेलै विवेकशील साझा पार्टीसे राजीनामा

पहुरा समाचारदाता
धनगढी, १७ फागुन । विवेकशील साझा पार्टीके सुदूरपश्चिम संयोजक गोपाल हमाल पार्टीसे राजीनामा डेले बाटै । हमाल आजके मितिसे लागू हुइना मेरके पार्टीके साधारण सदस्यसहित सम्पूर्ण जिम्मेवारीसे राजीनामा डेहल हुइट ।

‘मोर स्थायी बसोबास रहल धनगढी उपमहानगपालिकाके बासिन्दा फेनसे स्वतन्त्र होके उम्मेदवार बन्ना सुझाव डेले बाटै,’ पार्टीके अध्यक्षहे बुझाइल राजीनामा पत्रमे उल्लेख बा, ‘लम्मा समयसम राजनीति कैना मोर सोच फेन नैरहल ओ अन्तिमचो स्थानीय निर्वाचन लर्ना तयारी हुइल ओरसे आजके मितिसे पार्टीके साधारण सदस्यसहित सम्पूर्ण जिम्मेवारीसे राजीनामा डेहल जानकारी कराइटुँ ।’

हमाल २०७४ सावन २८ गतेसे विवेकशील साझा पार्टीमे प्रवेश कैटी सुदूरपश्चिम प्रदेश संयोजकके जिम्मेवारी पाइल रहिट । हमाल सुन्दर सुदूरपश्चिम अभियानके अभियन्ता हुइट ।