हलिया पुनर्स्थापना कैना नाउँमे रकम असुल करुइयाहे कार्वाहीके माग
पहुरा समाचारदाता
धनगढी, १७ फागुन । हलिया पुनर्स्थापना ओ छुट हलियाके सूचीकरण कैना नाउँमे रकम असुल करुइयाहे राष्ट्रिय मुक्तहलिया समाज महासंघ नेपालसे कारवाहीके माग करले बा ।
महासंघके केन्द्रीय अध्यक्ष ईश्वर सुनार मंगरके रोज विज्ञप्ति निकारके हलिया बस्तीसे झण्डै २२ लाख रकम ठगी करके फरार व्यक्तीहुकन नेपाल सरकारसे कारवाहीके माग करले बटै । कुछ मिडियामे हलिया पुनस्र्थापना ओ छुट हलियाके सूचीकरण कैना नाउँमे रकम असुल करके फरार हुइल समचारप्रति ध्यानकर्षण हुइल जनागिल बा ।
विज्ञप्तिमे कहल बा, रकम असुल कैनामे संलग्न गणेश लुहार, नरेश आउजी ओ कृष्ण लुहार लगायत व्यक्तिहुकनके समुहसे बैतडी, बझाङ ओ दार्चुला लगायतके जिल्लाके विकट हलिया बस्तीसे रकम असुल करके फरार हुइल बटै । ठगी करुइया व्यक्तिहुकन कारवाही ओ ठगी रकम असुल उपर करके फिर्ता कराइक लाग नेपाल सरकारसे माग करल बा ।
हलिया पुनर्स्थापना ओ सूचीकरणके नाउमे अनाधिकृत रुपमे रकम संकदन कैना व्यक्ति ओ संस्था अपनेहुकनके गाउँ वा टोलमे अइलेसे ०९१–५२०१६४ मे फोन सम्पर्क कैना ओ ओसिन व्यक्तिसे सचेत रहना विज्ञप्तीमे कहल बा ।
