धनगढी–पोखरा सिधा उडान सुरु

पहुरा समाचारदाता
धनगढी, १८ फागुन । धनगढीसे पोखरा उडान सुरु हुइल बा । बुद्ध एयरसे बुधसे पोखरा–धनगढी सिधा उडान सुरु करल हो । आब अँट्वारसे, बुध ओ शुकके उडान हुइना बावै । पोखरासे बुधके रोज १९ यात्रु बोकके विमान धनगढी आइल हो । पोखरासे बसमे धनगढी पुग्ना झण्डे २४ घण्टा लागठ् ।

जहाजमे इ दूरी ५५ मिनेटमे पूरा करे सेकजाइठ् । भाडादर ६ हजार ९ सयसे १२ हजार २ सय ४० रुपैयाँसम रहल बा । यात्रुके चाप ओ माग अनुसार दैनिक उडान कैना योजना रहल जनाइल बा । बुधके पहिल उडानसे नाटाके टोली धनगढी पुगल बा ।

पोखरासे धनगढी आपुगल बुद्ध एयरके पाइलट ओ यात्रुहुक्रे सुदूरपश्चिम प्रदेश सरकारके आर्थिक मालिमामन्त्री तारा लामा तामाङ, कैलाली उद्योग बाणिज्य संघके वरिष्ठ उपाध्यक्ष पुष्कर ओझा, नाटा सुदुरपश्चिमके अध्यक्ष मायाप्रकाश भट्ट लगायत धनगढी बिमानस्थमे स्वागत करल रहिट ।

विमानसे पहिल फ्लाइटमे १८ यात्रु बोकके धनगढी पुगल हो । सुदूरपश्चिम प्रदेशमे पर्यटन क्षेत्रमे काम कैटी रहल पर्यटकीय व्यवसायी धनगढी–पोखरा हवाई उडान सुरु हुइ लागलपाछे प्रदेशमे आन्तरिक तथा बाह्य पर्यटकके संख्या बह्रना अपेक्षा करल बा ।