८ लाख ६९ हजारहे हात्तीपाइले विरुद्धके औषधि खवैना
पहुरा समाचारदाता
धनगढी, १८ फागुन । कैलालीमे इहे फागुन २८ गतेसे हात्तीपाइलेके आम औषधि सेवन अभियान सुरु हुइना हुइल बा । हात्तीपाइले विरुद्धके १० औँ चरणके आम औषधि खवाइना अभियान जिल्लाके १३ स्थानीय तहमे फागुन २८ गतेसे चैत १५ गते सम सञ्चालन हुइ लागल हो ।
सुदूरपश्चिम प्रदेशके ८ ठो जिल्लामे हात्तीपाइले रोग निवारण होसेकल बा । मने कैलालीमे आभिनसम उ रोग निवारण हुइ नैसेकल स्वास्थ्य कार्यालय कैलालीके प्रमुख लालबहादुर धामी जानकारी डेलै । जिल्लामे ८ लाख ६९ हजार ८ सय ६९ जनहनहे हात्तीपाइले औषधि खवाइना लक्ष्य रहल स्वास्थ्य कार्यालय कैलाली जनैले बा ।
इ बेर कैलालीमे १० औँ चरणके अभियान सञ्चालन करल ओरसे सक्कु जनहनहे औषधि सेवन कैके सहयोग कैडेना स्वास्थ्य कार्यालयक प्रमुख धामी अनुरोध करले बाटै ।
खाली पेटमे सेवन करलमे किहु किहुहे वाक वाकी लग्ना, उल्टी हुइना, घुमरी लग्ना हुइ सेकठ् । खाना खाके वा नास्ता खाके औषधिके सेवन करे पर्ना जनाइल बा । दुई बरस नैपुगल बालबालिका, गर्भवती, सात दिनसमके सुत्केरी ओ सिकिस्त बिरामी औषधि सेवन नैकरे मिल्ना जनाइल बा ।
कलेसे हात्तीपाइले रोग मनैनहे नैमजासे शारीरिक रूपमे अशक्त, असमर्थ तथा अपांग बनैना एक सरुवा रोग हो । इ रोग एक मेरके मसिन धागो आकारके जुका जस्टे परजीवीके कारण लागठ् । संक्रमित पोथी लामखुट्टेके कटाइसे इ रोग सर्ना करठ् । मनैनके शरीरमे इ परजीवी प्रवेश करल कुछ बरस पाछे किल रोगके लक्षण डेखजाइठ् । लक्षण डेखसेकलपाछे भर रोग नै चोखाइठ् ।
हात्तीपाइले रोगसे बचक लाग तथा प्रारम्भिक अवस्थामे नै पूर्ण रूपमे चोखाइक लाग रोगके जोखिम रहल सक्कु जिल्लो राष्ट्रिय आम औषधि सेवन कार्यक्रम सञ्चालन हुइटी आइल बा ।
नेपाल सरकारसे रोग प्रभावित जिल्लामे हरेक बरस सञ्चालन कैना आम औषधि सेवन कार्यक्रममे सहभागी होके बरसके एकचो लगातार ६ बरससम हात्तीपाइले रोग विरुद्धके औषधि सेवन कैना ओ औरे जनहनहे फेन खाइ लगैना करल बा ।
हात्तीपाइले रोगसे बचक लाग तीन मेरिक औषधि प्रयोग करजाइठ् । जौन पूर्णरुपमे सुरक्षित मानजाइठ् । इ औषधि दशौँ बरससे विश्वभर प्रयोग हुइटी आइल बा । तीन मेरिक औषधि हात्तीपाइले रोग लागसेकलके उपचार हुइनाके साथे रोग लग्नासे समेत बचाइठ् ।
हात्तीपाइले रोगसे बचक लाग उचाई ओ उमेर समूह अनुसार औषधि डेजाइ । यीबेर आरभरमेक्टिन, डीईसी ओ अरबेन्डाजोल औषधि खवाजैना बा । यीबेर ९० सेन्टिमिटरसे कम मने २ वर्षसे उप्परहे आरभरमेक्टिन नैडेजाइ मने डीईसी ओ अरबेन्डाजोल १÷१ चक्की डेजाइ । ९० सेमिसे ११२ सेमिसमके हे आरभरमेक्टिन, डीईसी ओ अरबेन्डाजोल सक्कु १/१ चक्की डेजाइ ।
ओस्टेक, ११३ सेमिसे १३३ सेमि समकेहे आरभरमेक्टिन ओ डीईसी २/२ ओ अरबेन्डाजोल १ चक्की, १३४ सेमिसे १४६ सेमिसमकेहे आरभरमेक्टिन ओ डीईसी ३/३ ओ अरबेन्डाजोल १ चक्की ओ १४७ सेमिसे ढेर उचाई रहलहे आरभरमेक्टिन ओ डीईसी ४/४ ओ अरबेन्डाजोल १ चक्की हात्तीपाइले रोग विरुद्धके औषधि डेजाइ ।
दुई बरस उमेर नैपुगल बालबालिका, गर्भवती ओ सात दिनसमके सुत्केरी तथा सिकिस्त बिरामी (कौनो कडा रोग लागके औषधि सेवन कैटीरहल, जस्टे क्यान्सर, मुटु रोगी, कलेजो रोगी, फोक्सोके दीर्घ रोगी), छारे रोगी, २४ घण्टाभिट्टर जुरी आइल तथा कडा कुपोषण रहल पाँच बरस टरेक बालबालिका इ औषधि सेवन नैकरे पर्ना जर्ना जनाइल बा ।
इ औषधि खाली पेटमे नैखाइ पर्ना जनाइल बा । शरीरमे हात्तीपाइले रोगके परजीवी रहल व्यक्तिहुक्रनके हात्तीपाइले रोग विरुद्धके औषधि सेवन करलपाछे सामान्य खालके कपार दुखाइ, वाकवाकी लग्ना तथा पेट बठैना हुइ सेकठ् सेती प्रादेशिक अस्पतालके सर्जन कन्सल्ट फिजिसियन डा शेर बहादुर कमर औष्षधीके कैना प्रतिक्रियाबारे जानकारी डेहल रहिट ।
यदि ओइसीन हुइलेसे औषधिसे प्रभावकारी काम कैटी रहल बा कना बुझे पर्ना उहाँ बटैले बाटै । उ लक्षण कुछ घण्टाभित्रे अपनहे हेराके जाइठ् । मने उ लक्षण लम्मा समयसम रहलमे लग्गेक स्वास्थ्य संस्थामे आवश्यक सल्लाह ओ उपचारके लाग सम्पर्क करे पर्ना जनाइल बा ।
नेपाल पत्रकार महासंघ कैलालीके अध्यक्ष हिमालय जोशीके अध्यक्षतामे कार्यक्रमके संचालन मिन बहादुर धामी करले रहिट ।
