सभापतिमे बम ओ भट्ट विच प्रतिस्पर्धा
सभापतिके उम्मेदवार बमहे कलेल पक्षके समर्थन
पहुरा समाचारदाता
धनगढी, १८ फागुन । नेपाली कांग्रेस कैलालीके नयाँ सभापति चयनके लाग विफेक रोज (आज) दुसरा चरणके मतदान हुइटी बा ।
दुसरा चरणमे प्रकाश बहादुर बम ओ नारायणदत्त भट्टविच प्रतिस्पर्धा हुइना बा । पहिल चरणमे हुइल निर्वाचनसे कौनो फेन उम्मेदवार ५० प्रतिशत मत नैनानलपाछे डुसरा चरणमे मतदान हुइ लागल हो । पहिल चरणमे अँट्वारके हुइल निर्वाचनमे प्रकाश बम, नारायणदत्त भट्ट ओ रामबहादुर कलेल प्रतिस्पर्धामे उत्रल रहिट ।
दुसर चरणके चुनावके एक दिन आघे बुधके रोज धनगढीमे पत्रकार सम्मेलनके आयोजना करके टिसरा शक्ति सभापतिके प्रत्यासी रामबहादुर कलेल अपन समुह दुसरा चरणमे सभापतिमे बमहे सर्मथन ओ सहयोग कैना घोषणा कैले बटै । उहाँ कहलै, बमहे सर्मथन करेबेर कौनोफे पदीय लोभ लालच नइरहल ओ यम्ने कोईफे भ्रममे नपरबी । केन्द्रीय नेतृत्वके रवैयाके विरुद्धमे हम्रे सभापतिमे बमहे सहयोग करटी । कलेल समुह आपन मतदाताहे आब सभापतिके उम्मेदवार बमहे मत डेना आग्रहफे करल रहिट ।
कार्यक्रममे बोल्टी पूर्व जिल्ला उपसभापति विरबहादुर हमाल, पार्टीके जिल्ला सभापति तथा प्रदेश महामन्त्री नरनारायण शाह ‘मन’, पूर्व केन्द्रीय सदस्य चन्द्र सिह भट्टराईफे सभापतिमे प्रकाश बममे सर्मथन करले रहिट । ओस्टेक पार्टीके पूर्व जिल्ला सभापति गोविन्दराज जोशीफे बमहे अपन साथ सहयोग करल बटैले बटै ।
पत्रकार सम्मेलनमे बोल्टी सभापतिके उम्मेदवार प्रकाश बहादुर बम पार्टीके चुनावफे शत्रुसे लरल जैसिन अनुभव हुइल बटैले बटै । कैलालीमे तीन ठो विचार धारा बोकल टीमविच प्रतिस्पर्धा हुइल रहे,’ उहाँ कहलै, महिहे पहिल चरणमे विश्वास करके सबसे ढेर मत डेलैं उहे विजयी हो ।आज हुइना निर्वाचनमे टिसरा शक्तिके रुपमे रहल सभापतिके प्रत्यासी रामबहादुर कलेल लगायत आदरणिय नेताहुक्रे दुसरा चरणमे मोर विचधाराहे आत्मसात करटी सर्मथन करटै उहीसे हमार जित सुनिश्चित हुई । मै ओइनके समर्थनके उच्च कदरफे करटु ।’ विजयी पश्चात कैलालीहे नेपाली काँग्रेसमय बनैनाके साथे सक्कुहुनके मिलाके लैजैना उहाँ प्रतिवद्धता जनैलै ।
सोम्मार ओराइल मतगणना अनुसार बम एक हजार १६९, भट्ट एक हजार ७२ ओ कलेल १९७ मत प्राप्त करल रहिट । मने, कोइ फेन ५० प्रतिशत मत नैआइल ओरसे डुसरा चरणके मतदान हुइ लागल हो । काँग्रे्रेसके विधान अनुसार सभापतिमे जिटक लाग एक हजार २४३ अर्थात ५० प्रतिशतसे ढिउर मत अनिवार्य रुपमे लाने पर्ना रहल बा । मने, तीनु जाने उम्मेदवारके पक्षमे विधान अनुसार मत नैपरलपाछे सभापति चयनके लाग डुसरा चरणके निर्वाचन हुइना हुइल हो । आब बम ओ भट्टबीच प्रतिस्पर्धा हुइना बा ।
काँग्रे्रेस सभापति चयनके लाग डुसरा चरणमे प्रतिस्पर्धा कैना योग्य हुइल बम ओ भट्ट दुनु जाने संस्थापन पक्षके हुइट । संस्थापन इतर पक्षसे सभापतिमे उम्मेदवारी डेहल रामबहादुर कलेल भर पहिल चरणसे बाहर हुइल बटै । सभापति होडसे बाहर संस्थापन इतरपक्ष आब काँग्रे्रेस कैलालीके सभापति जिटैनामे निर्णायक डेखल बा । उ पक्षके उम्मेदवार कलेलसे प्राप्त करल १९७ मत एकमुष्ट रुपमे बमके पक्षमे गैलपाछे बमहे जिटक लाग काफी हुइना डेखल बा ।
ओस्टेक कैलाली निर्वाचन क्षेत्र नम्बर २ के नेता कमल शाह भर भट्टहे सर्मथन करल जनैले बटै ।
