लिटिल बुद्ध ओ गणेश बाबा बिजयी

पहुरा समाचारदाता
बौनिया, १९ फागुन । बर्दगोरियामे जारी बालबाटिका क्रिकेट लिग यु–१९ विद्यालय स्तरीय टि–ट्वान्टी प्रतियोगिताके टिसरा दिनके खेलमे लिटिल बुद्ध ओ गणेश् बाबा विजयी हुइल बाटै । पहिल खेलमे लिटिल बुद्ध विद्या भूषण पब्लिकहे ३ विकेटसे पराजित करल रहे । मुडा बजार स्थित खेल मैदानमे सम्पन्न खेलमे विद्या भुषणसे डेहल १ सय ४५ रनके लक्ष्य लिटिल बुद्ध १८.५ ओभरमे ७ विकेट गुमैटी लक्ष्य भेटाइल हो ।

विद्या भुषणके ब्याटिङमे नारायण जोशी ४९ बलमे ६ चौका ओ ७ छक्काके मद्दतमे ७६ रन बनाइल रहिट । बलिङ ओर लिटिल बुद्धके सागर थापा ओ रोयल बम समान ४÷४ बिकेट लेहल रहिट । खेलके प्लेयर अफ द म्याच सागर थापा घोषित हुइटी एक हजार रुपैयाँ प्राप्त करल रहिट । लिटिल बुद्धके ओरसे सुशील खडका ४१ तथा सागर थापा २८ रनके योगदान करल रहिट ।

डुसरा खेलमे गणेशबाबा कर्णाली माविहे ३ बिकेटसे पराजित करल रहे । कर्णाली माविसे डेहल ८१ रनके लक्ष्य पछ्याइल गणेश बाबा १४.४ ओभर खेल्टी ७ बिकेट गुमैटी लक्ष्य भेटाइल हो । गणेश बाबाके गणेश बिष्ट १९ रन बनाइल रहिट । खेलके म्यान अफ द म्याच गणेश बिष्ट घोषित हुइल रहिट ।

उहीसे आघे टस जितके पहिले ब्याटिंग करल कर्णाली मावि निर्धारित २० ओभर मध्य १४.१ ओभरमे अल आउट हुइटी ८१ रन बनाइल रहे । कर्णाली माविके लक्की कठायत ३२ रनके योगदान डेहल रहिट । गणेशबाबाके बलिङमे पारस तिमिल्सिना ओ गणेश बिष्ट समान ३÷३ विकेट लेहल रहिट । प्रतियोगिता अन्तर्गत शुकके फेन दुई खेल संचालन हुइना बावै ।

पहिल खेलमे सकारे ९ः ३० बजे होलिल्याण्ड अत्तरिया ओ गुरुकुल एकाडेमी लम्की तथा डुसरा खेलमे दिनके १ः३० बजे आयोजक बालबाटिका ओ लिटिल बुद्ध बिच प्रतिस्पर्धा हुइना बा । प्रतियोगिताके विजेता टिम १ लाख ५० हजार तथा उपविजेता ७५ हजार रुपैयाँ प्राप्त कैना बाटै । ओस्टके प्रतियोगिताके उत्कृष्ट खेलाडी १६ हजार रुपैयाँ, उत्कृष्ट ब्याट्सम्यान ओ बलर ओ उदयिमान खेलाडी समान १० हजार रुपैयाँ प्राप्त कैना बाटै ।