फोनिज सुदूरपश्चिमके अध्यक्षमे लखन चौधरी
पहुरा समाचारदाता
धनगढी, २० फागुन । नेपाल आदिवासी जनजाति पत्रकार महासंघ (फोनिज) सुदूरपश्चिम प्रदेशमे डुसरा अधिवेशन धनगढीमे सम्पन्न हुइल बा ।
अधिवेशनसे फोनिज प्रदेश अध्यक्षमे लखन चौधरीहे सर्वसम्मतसे चयन कैटी लावा कार्यसमिति चयन करले बा । समितिके उपाध्यक्षमे जुद्ध चौधरी, महासचिवमे कालीमैया चौधरी ‘उन्नति’, सचिवमे भानुप्रताप राना (संगठन), बलराम चौधरी (संस्थागत) ओ कोषाध्यक्षमे दुर्जन चौधरी चयन हुइल बाटै ।
ओस्टके, सदस्यमे रजनी राना, नन्दलाल राना, टीआर कठरिया ओर नरेन्द्र चौधरी चयन हुइल बाटै ।
उहीसे आघे, निवर्तमान अध्यक्ष भीम चौधरीके अध्यक्षतामे हुइल उद्घाटन सत्रमे फोनिजके केन्द्रीय उपाध्यक्ष लक्की चौधरी, नेपाल पत्रकार महासंघ सुदूरपश्चिमके उपाध्यक्ष योगेन्द्र बलायर, फोनिजके प्रदेश इन्चार्ज रामचन्द्र कुश्मी, नेपाल पत्रकार महासंघ कैलालीके अध्यक्ष हिमाल जोशी लगायत शुभकामना मन्तव्य राखल रहिट ।
