मेयर धनगढी प्याब्सन कप शुकसे
पहुरा समाचारदाता
धनगढी, २४ फागुन । मेयर धनगढी प्याब्सन कप विद्यालय स्तरीय क्रिकेट प्रतियोगिता शुकसे हुइना बा । धनगढी प्याब्सनके आयोजनामे प्रतियोगिता शुकसे सुरु हुइना मंगरके रोज धनगढीमे पत्रकार सम्मेलन मार्फत जानकारी डेहल बा ।
धनगढी प्याब्सन कपके विजेतासे एक लाख एक हजार एक सय ११ रुप्या ओ उपविजेता ५१ हजार एक सय ११ रुप्या प्राप्त कैना प्रतियोगिताके संयोजक कलेन्द्र शाही जानकारी डेलै । उहाँक अनुसार व्यक्तिगत विधाओर उत्कृष्ट खेलाडी १० हजार रुप्या, ब्याट्सम्यान, बलर ओ उदयमान खेलाडी समान पाँच हजार रुप्यासहित ट्रफी, मेडल ओ प्रमाणपत्र प्राप्त करही । प्रत्येक खेलके म्यान अफ दी म्याचसे एक हजार रुपैंया पैही ।
‘विद्यालयस्तरसे क्रिकेट खेलाडीके प्रतिभा उजागर करेक लाग धनगढी उपमहानगरपालिका भिटरके नीजि तथा सामुदायिक विद्यायलयके टीम बिच प्रतियोगिता आयोजना करे लागल हो ।’ प्रतियोगिता संयोजक शाही कहलै–‘धनगढीमे क्रिकेटके चहलपहल बढैना, यहाँके क्रिकेट खेलप्रति उत्प्रेरित करैना, सुदुरपश्चिमहे खेलके माध्यमसे देशभर चिन्हैना उद्देश्यसहित प्रतियोगिता सञ्चालन करे लागल हो । प्रतियोगिताहे विद्यालय स्तरीय उत्कृष्ट प्रतियोगिताके रुपमे स्थापित कैना मुख्य उद्देश्य रहल बा ।’
स्वास्थ्यके लाग खेलकुद, राष्ट्रके लाग खेलकुद, समाजके लाग खेलकुद कना मूल नाराके साथ खेलकूदहे विकास कैना अइटी रहल धनगढी उपमहानगरपालिकासे यी प्रतियोगिता प्रवद्र्धन करल आयोजक जनैले बा । ‘संयोजक शाही कहलै–‘विद्यालयस्तरसे योग्य खेलाडी उत्पादन कैना अभिप्रायसे यी प्रतियोगिता विगत वर्षसे सञ्चालन हुइटी रहल बा । विद्यालयमे नुकके रहल क्रिकेट प्रतिभाहे विकास कैना प्रतियोगितासे सेक्ना प्रयास करटी आइल बा ।’
धनगढीके संघीय प्रहरी कार्यालयके मैदानमे हुइना प्रतियोगितामे धनगढी नगर क्षेत्रके २० ठो नीजि ओ सामुदायिक विद्यालयके सहभागीता रहना हुइल बा । सहभागी विद्यालयमे एररिस्टो इङ्लिस बोर्डिङ्ग हाई स्कुल, सारदा विद्या निकेतन, ग्यालक्सी हाई स्कुल, त्रिनगर माध्यमिक स्कुल, ओक्सफोड युनिभर्सल रिडेक्स हाई स्कुल, धनगढी मोडेल टेक्निकल स्कुल, ग्ली एकेडेमी स्कुल, लिट्ल फ्लावर बोर्डिङ्ग हाई स्कुल, द गार्डनर इङ्लिस बोर्डिङ्ग स्कुल रहल बटै । ओस्टेक, शारदा माध्यमिक स्कुल, कैलाली मोडेल एकेडेमी स्कुल, ऐश्वर्य विद्या निकेतन धनगढी, वेष्टन क्रिष्टल एकेडेमी, ज्योती इङ्लिस बोर्डिङ्ग स्कुल, कैलाली विद्या निकेतन, फारवेष्ट इङ्लिस बोर्डिङ्ग स्कुल, स्टेपिङ्ग स्टोन इङ्लिस बोर्डिङ्ग स्कुल, थ्री स्टार बोर्डिङ्ग स्कुल, ब्राइट वे पब्लिक स्कुल ओ पञ्चोदय माध्यमिक विद्यालय प्रतियोगितामे प्रतिस्पर्धा करही ।
प्रतियोगितामे प्रथम पुरस्कार मेघा पब्लिकेशन प्रा.लि. काठमाण्डौंसे प्रायोजक करले बा कलेसे दुसरा पुरस्कारके प्रायोजन धनगढीमे रहल इमेज होटेल करले बा । ओस्टेक प्रतियोगिता अवधिभर हरेक खेलके म्यान अफ द म्याच धनगढीमे रहल जेम्स एकेडेमी प्रायोजन करले बा । कलेसे सर्वोत्कृष्ट खेलाडीके पुरस्कार धनगढीमे रहल थ्री स्टार बोडिङ्ग स्कुल प्रायोजन करले बा । वेष्ट बलर ओ उदयमान खेलाडी पुरस्कार गुरुकुल एकेडेमी, वेष्टव्याट्स म्यानके प्रायोजन मयूर इङ्लिस बोडिङ्ग स्कुल करले बा । यी प्रतियोगितामे मुख्य प्रायोजक धनगढी उप–महानगरपालिका रहल बा ।
