१८ प्रतिस्पर्धीहे उछिन्टी सरिता चौधरी प्रथम
पहुरा समाचारदाता
धनगढी, २५ फागुन । ११२ औं अन्तर्राष्ट्रिय श्रमिक महिला दिवसके अवसरमे ‘नेपाली महिलाके विगत ओ वर्तमान अवस्था’ शीर्षकमे आयोजित वक्तृत्वकला प्रतियोगितामे साइप्रसमे रहल सरिता चौधरी प्रथम हुइल बाटी ।
प्रवासी नेपाली मञ्च, युरोप कमिटी महिला विभागसे आयोजना करल वक्तृत्वकलामे टमान देशमे रहल १८ जाने प्रतिस्पर्धीहे उछिन्टी चौधरी प्रथम स्थान हासिल करल हुइटी । उहाँ चार सय युरो पुरस्कार हात परले बाटी । प्रथम स्थान हासिल करुइया चौधरी प्रवासी नेपाली मञ्च साइप्रसके प्रवक्ता फेन हुइटी । भर्चुअल माध्यमसे करल प्रतियोगितामे १९ जनहनके सहभागिता रहल रहे ।
उ प्रतियोगितामे डेनमार्कमे रहल सर्मिला पाण्डेय द्वितीय, इजरायलमे रहल जेनिशा राई तृतीय हुइल बाटै । डुनु जाने क्रमशः ३००, २०० युरो पुरस्कार प्राप्त करल रहिट । ओस्टके, डेनमार्कमे रहल सविता महत्रा ओ युकेमे रहल अहिल्या कुँवर सान्त्वना स्थान प्राप्त करले बाटै । डुनु जाने एक/एक सय युरो पुरस्कार प्राप्त करल आयोजक जानकारी डेहल बा ।
नेकपा एमालेके पोलिटब्युरो सदस्य एवम् प्रतिनिधि सभा सदस्य सुजिता शाक्यके प्रमुख आतिथ्यतामे रहल वक्तृत्वकला प्रतियोगितामे प्रतिनिधि सभा सदस्य विद्या भट्टराई, एमालेके केन्द्रीय सदस्य सृजना काफ्ले, बियोण्ड द बेइजिङके निवर्तमान अध्यक्ष शान्ता लक्ष्मी श्रेष्ठ निर्णायक रहल रहिट ।
