कुलदीप गुप्ता हत्या प्रकरणः दुई जाने पक्राउ
पहुरा समाचारदाता
धनगढी, २७ फागुन । भारतीय नागरिक कुलदीप गुप्ताके हत्यामे संलग्न दुई जाने पक्राउ परल बाटै । जिल्ला प्रहरी कार्यालय कैलाली शुकके रोज पत्रकार सम्मेलन कैके पक्राउ परल डुनु जनहनहे सार्वजनिक करले बा ।
कैलाली प्रहरीके प्रमुख तथा प्रहरी उपरीक्षक (एसपी) विश्व अधिकारीके अनुसार हत्या आरोपमे पक्राउ परल बाजुराके खप्तड छेडदहके राजेन्द्र बुढा(२४) ओ भुपेन्द्र बुढा (२०) हे सार्वजनिक करल हो ।
बुढाद्वय मिलके गुप्ताके हत्या करल प्रहरी अनुसन्धानसे खुलल् एसपी अधिकारी जानकारी डेलै । अटो भाडाके विषयमे विवाद होके बुढाद्वय ओ गुप्ता बिच हात हादाहाद ओ मारपिट हुइल प्रहरीके अनुसन्धासे खुलल् बा । पाछे गुप्ता सडक किनार नालीमे गिरलपाछे भुपेन्द्र बुढा अटोमे रहल काठके फठ्ठी प्रहार कैके हत्या करल प्रहरी जनैले बा ।
मादक पदार्थ सेवन करल अवस्थामे तत्कालके रीस आवेग थामे नैसेकके गुप्ताके हत्या करल पक्राउ परल डुनु जाने स्वीकार करल फेन प्रहरी जनैले बा । पक्राउ कैके ज्यान सम्बन्धी कसुरमे थप अनुसन्धान हुइटी रहल एसपी अधिकारी जानकारी डेलै ।
सोम्मारके रोज धनगढीके वडा नम्बर ५ शिवनगर ओ जाई जोर्ना सडक किनार नालीमे भारतके उत्तरप्रदेशस्थित शाहजापुराके अन्दाजी ४२ वर्षीय गुप्ताके शव फेला परल रहे । ओहे डगरा हुइटी जाइबर एक युवती सोम्मारके सकारे पौने १० बजेओर युवकके शव डेखलपाछे प्रहरीहे खबर करल रही ।
प्रहरी गुप्ताके हत्या हुइल निष्कर्ष निकारल रहे । गुप्ता भारतसे धनगढी शिवपुरी धाम लग्गे डेरा कैके बैठ्टी आइल रहिट ।
