वडा कार्यालयसे १२ क्लबहे खेलकुद सामग्री वितरण

पहुरा समाचारदाता
हसुलिया, १ चैत । कैलालीके कैलारी गाउँपालिका–७ के वडा कार्यालय उ वडामे रहल १२ गाउँक १२ ठो युवा क्लबहे खेलकुद सामग्री ओ पोशाक वितरण करले बा ।

खेलाडीहे प्रोत्साहन करना ओ खेलकुद विकासमे सहयोग पुगैना उद्देश्यके साथ वडा कार्यालय क्लबहे पोशाकसहित, भलिबल, फुटबल ओ गोलकिपर लगैना पञ्जा वितरण करल हो ।

चालू आर्थिक वर्षके महिला तथा बालबालिका लक्षित वर्ग कार्यक्रम अन्तर्गत क्लबहे खेलकुद सामग्री वितरण करल वडाध्यक्ष कमलप्रसाद चौधरी जानकारी डेलैं ।

गाउँपालिका अध्यक्ष लाजुराम चौधरीके प्रमुख आतिथ्यतामे हुइल कार्यक्रममे १२ ठो क्लबहे एक÷एक थान भलिबल ओ फुटबल, एक÷एक जोड गोल किपिङ पञ्जा ओ आवश्यक पोशाक प्रदान करल वडाध्यक्ष चौधरी जानकारी डेलैं । उहाँ फुटबल ओ भलिबलके १९२ सेट पोशाक प्रदान करल जनैलैं । ‘टमान जैसिन क्लब खेलाडीके पोशाक खरिद करे नैसेकठ,’ उहाँ कलैं, ‘उहाँहुकनहे खेलमे प्रोत्साहन करना उद्देश्यसे हम्रे वडासे सहयोग करल हो ।’ ओस्टेक, छटकपुर वसन्ताके भलिबल ट्रेनिङ सेन्टरहे १० ठो प्रशिक्षण बल फेन प्रदान करल बा ।

कार्यक्रममे वडा सदस्य फिरुराम चौधरी, सुन्दरप्रसाद चौधरी, वडा नम्बर ७ के वडा सचिव गणेश चौधरी, माओवादी केन्द्रके वडा इञ्चार्ज तुल्सीराम चौधरी, भलमन्सा रामलाल चौधरी, टमान क्लबके खेलाडीहुकनके सहभागिता रहल रहे ।