कैलारीमे जग्गाके निस्सा वितरण सुरु

पहुरा समाचारदाता
धनगढी, २ चैत । कैलालीके कैलारी गाउँपालिकासे जग्गाके निस्सा (ऐलानी, प्रति जग्गा उपभोग करटी रहल प्रमाण) वितरण कार्य सुरु करले बा ।
राष्ट्रिय भूमि आयोगसंग हुइल सम्झौता बमोजिम गाउँपालिकासे भूमिहीन दलित, भूमिहीन सुकुम्बासी ओ अव्यवस्थित बसोबासीहे जग्गाके निस्सा वितरण कार्य सुरु करल हो । बुधके रोज वडा नम्बर ७ स्थित हौसलपुर ओ मोहनपुर गाउँके भूमिहीन, अव्यवस्थित बसोबासीहे निस्सा डेहल बा ।

गाउँपालिकाके अध्यक्ष लाजुराम चौधरी र उपाध्यक्ष लक्ष्मी सत्गौंवा स्थानीयहे निस्सा वितरण करल कार्यक्रमके उदघाटन करल रहिट । उ क्रममे गाउँपालिकाके अध्यक्ष लाजुराम चौधरी ऐलानी, पर्ती जग्गा कैयौं वर्षसे उपभोग करटी अइलेसेफे लालपूर्जाबिहीन स्थानीयवासीहुक्रे जग्गाके मालिक बन्ना पहिल प्रक्रिया सुरु हुइल बटैलै ।

उहाँ जग्गा जोत, उपभोग करटी रहल प्रमाण गाउँपालिकासे डेहल बटैलै । ‘यी जग्गाके लालपूर्जा नइहो’, निस्सा वितरण करटी उहाँ कहलै । ‘अपनेहुक्रे कटरा ऐलानी, पर्ती जग्गा उपभोग करटी बटी, ओकर प्रमाण अपनेहुकनहे डेहल हुई ।’ जग्गाके नाप, नक्सा आब यिहे निस्साके आधारमे हुइना अध्यक्ष चौधरीके कहाई रहे ।

उहाँ जग्गा सम्बन्धी सक्कु विवाद समाधान होए कहिके गाउँपालिकासे निस्सा डेहल बटैलै । ‘अपनेनके पूर्जा नइहो । उ नइहुके पसल सञ्चालन कैनाफे नातागोताके सहारा लेहे परल कैना बटैलै ।’

ओस्टेक, गाउँपालिकाके उपाध्यक्ष लक्ष्मी सत्गौंवाले जग्गाके निस्सा प्राप्तीसे ‘जग्गा मोर हो’ कहिके ढुक्कके साथ भोगचलन करे पैना बटैली । उहाँ जग्गाके लालपूर्जा पाइक लाग १० वर्षसे भोगचलन करल हुई पर्ना ओ वडा कार्यालयमे कर बुझाइल हुई पर्ना बटैली ।
उपाध्यक्ष सत्गौंवा गाउँपालिकाके न्यायिक समितिमे ढेर जैसिन ऐलानी पर्ती जग्गाके विवाद अइना करल उल्लेख करली । ‘कित्ता काटके क्रममे साँध, सीमा सवालमे मिलके सक्कु जे एक÷दुसरहे सहयोग कैबी, उहाँ कहली ।

वडा नम्बर ७ के वडा अध्यक्ष कमलप्रसाद चौधरी निस्सा पैना सक्कुहुनके लाग ऐतिहासिक दिन रहल बटैलै । उहाँ निस्सा वितरणपाछे अभिन महत्वपूर्ण ओ जटिल कार्य बाँकी रहल उल्लेख करलै । ‘पहिल चरणके कार्यक्रम पश्चात आब हम्रे झन जटिलताओर जैटी रहल बटी, उहाँ कहलै । गाउँपालिकासे पहिल चरणमे हौसलपुरके २८ ओ मोहनपुरके ६० करके ८८ परिवारहे जग्गाके निस्सा वितरण करले बा । निस्सा पाइलपाछे स्थानीय खुशी हुूइल बटै । अपने ४० वर्षसे १७ कटठा ऐलानी जग्गा उपभोग करटी आइल उल्लेख करटी हौसलपुरके सोहनलाल चौधरी उ जग्गा अपन नाममे बनैना प्रक्रियामे गैल पाछे खुशी लागल बटैलै ।

‘ऐलानी जग्गा खनजोत करल तीन पुस्ता हुसेकल, उहाँ कहलै । ‘मने, अभिनसम जग्गा अपन नाममे नइहो । आब लालपूर्जा पैना प्रक्रियामे गैलपाछे खुशी लागल बा । हौसलपुरके मिना चौधरी जग्गाके निस्सा पाके खुशी लागल बटैली । ‘१४÷१५ कटठा ऐलानी जग्गा उपभोग करटी आइल बटी, उहाँ कहली । ‘उ हम्रे खनजोत करटी रहल प्रमाण गाउँपालिकासे पाके खुशी लागल बा ।’

निस्सा वितरण कार्यक्रममे गाउँपालिकाके प्रमुख प्रशासकीय अधिकृत वीरबहादुर ऐर, गाउँ सभा सदस्यहुक्रे, सक्कु गाउँक भलमन्साहुक्रे, सामुदायिक वनके पदाधिकारी, वडा कार्यालयके कर्मचारी लगायतके उपस्थिति रहल रहे । वडा सदस्य मुसम्फीदेवी चौधरी स्वागत करल कार्यक्रमके सञ्चालन गाउँपालिकाके सामाजिक शाखा प्रमुख यगम कलेल सञ्चालन करले रहिट ।