म्यादी प्रहरीमे आवेदन डेहुइयाके आक्रर्षण
पहुरा समाचारदाता
धनगढी, ६ चैत । अइना वैशाख ३० गतेके स्थानीय तहके निर्वाचनके लाग सरकार देशभरसे एक लाख म्यादी प्रहरीके लाग आवेदन माग करले बा । उहे अन्तर्गत जिल्ला प्रहरी कार्यालय कैलालीमे म्यादी प्रहरीके लाग आवेदन खुला करलपाछे लउण्डा लउण्डीके आकर्षण बह्रल हो ।
आवेदन खुलल पहिल दिन सकारेसे लउण्डा लउण्डीके जिल्ला प्रहरी कार्यालयमे भीड लागल रहे । जोरके घाममे फे लाइनमे लागके लउण्डा लयण्डीहुक्रे आवेदन डेहल रहिट । म्यादी प्रहरीके आवेदन यिहे चैत ११ गतेसम लेना बा । देशमे बढटी वेरोजगारी ओ प्रहरी सेवामे पाछे पैना अवसरके खोजी करटी म्यादी प्रहरीमे आवेदन डेहुइयाके आक्रर्षण बह्रल बा । ११ गतेसम १८ वर्ष पूरा हुइल ओ ५४ वर्ष नइनाघल इच्छुक व्यक्ति म्यादी प्रहरीमे भर्नाके लाग आवेदन डेहे सेक्ही ।
सुदूरपश्चिम प्रदेशमे झन्डे १० हजार म्यादी प्रहरी भर्ना कैना हुइल बा । अइना वैशाख ३० गते हुइना स्थानीय तहके निर्वाचनके लाग सुदूरपश्चिमके नौ जिल्लामे करके कुल नौ हजार नौ सय ३७ म्यादी प्रहरी भर्ना कैना सुदूरपश्चिम प्रदेश प्रहरी कार्यालय जनाइल हो ।
प्रदेश प्रहरी कार्यालय धनगढीके प्रवक्ता प्रहरी वरिष्ठ उपरीक्षक भोला बहादुर रावलके अनुसार सबसे ढेर कैलाली ओ सबसे कम डडेल्धुरामे म्यादी प्रहरी भर्ना करे लागल बटैलै ।
कैलालीमे दुई हजार चार सय ५७, कञ्चनपुरमे एक हजार चार सय ६९, बैतडीमे आठ सय १५, दार्चुलामे सात सय ४२, डोटीमे आठ सय १०, डडेल्धुरामे ६ सय ५२, बझाङमे एक हजार ९३, अछाममे एक हजार दुई सय ३१ ओ बाजुरामे ६ सय ६२ म्यादी प्रहरी भर्ना कैना हुइल बा ।
गृह मन्त्रालयसे स्थानीय तहके निर्वाचन लक्षित करटी अँटवार (चैत्र ६) गते से म्यादी प्रहरीके लागी आवेदन खुला करले बा । जेम्ने सुदूरपश्चिमके नौ जिल्लामे योग्य व्यक्तिहे म्यादी प्रहरीमे भर्ना कैना सुदूरपश्चिम प्रदेश प्रहरी कार्यालय जनैले बा । म्यादी प्रहरी हुइक लाग साधारण लेखपढ करे जन्ना, कौनो राजनीतिक दलके सदस्य नइबनल, कौनो नैतिक पतन विल्गैना फौजदारी अभियोगमे कसुरदार नइठहरल, शारीरिक तथा मानसिक रूपसे तन्दुरुस्त रहल व्यक्तिहे छनौट कैना प्रहरी वरिष्ठ उपरीक्षक रावल बटैलै ।
