ट्रक दुर्घटनामे दुईके मृत्यु
पहुरा समाचारदाता
धनगढी, ७ चैत । सुदूरपश्चिम प्रदेशके कैलाली ओ बैतडीमे हुइल अलग अलग ट्रक दुर्घटनामे दुई जानेक मृत्य हुइल बा । कैलालीके लम्की–१० मे ट्रकके ठक्करसे २८ वर्षीय टेकबहादुर रावलके मृत्यु हुइल बा । रावलके मृत्यु हुइलपाछे उहाँक आफन्त तथा स्थानीयसे राजमार्ग अवरुद्ध पारल रहिट । मंगर सकारे फेर आठ बजे वार्ता कैना करके सहमतिमे कैलालीके लम्की सडक खण्ड खुलाइल प्रहरी जनैले बा ।
ओस्टेक करके ट्रक दुर्घटना हुके बैतडीमे एक जानेक मृत्यु हुइल बा कलेसे पाँच घाहिल हुइल बटै । मृत्यु हुइलमे सुर्नया गाउँपालिका–३ के २५ वर्षीया दुर्गा चन्द रहल इलाका प्रहरी कार्यालय पाटनके प्रमुख, प्रहरी निरीक्षक राजेश शाही जानकारी डेलै ।
गैल रात दशरथचन्द राजमार्गअन्तर्गत पाटन नगरपालिका–६ मा से १ ख १२४२ नम्बरके मिनी ट्रक दुर्घटना हुइल रहे । दुर्घटनामे सख्त घाहिल चन्दके उपचारके क्रममे डडेल्धुरा अस्पतालमे मृत्यु हुइल हो ।
दुर्घटनामे सुर्नया गाउँपालिका–३ के ३५ वर्षीया माधवी चन्द, ३५ वर्षीया वसन्ती भट्ट, ३३ वर्षीया कलावती भट्ट, २८ वर्षीया विमला चन्द ओ २३ वर्षीया पार्वती विष्ट घाहिल हुइल बटै । माधवी, वसन्ती ओ कलावतीके डडेल्धुरा अस्पतालमे तथा विमला ओ पार्वतीके पाटन प्राथमिक स्वास्थ्य केन्द्रमे उपचार हुइटी रहल बा । पाटनसे घर पोत्न लाल माटी लेके लौटटी रहल मिनी ट्रक सडकके नालीमे पल्टल हो । चालक पाटन नगरपालिका–४ के वीरेन्द्र खत्री फरार बटै ।
