राष्ट्रिय भलिबल प्रतियोगिता सुरु: सुदूरपश्चिम ओ आर्मीके विजयी सुरुवात
पहुरा समाचारदाता
धनगढी, ७ चैत । मुख्यमन्त्री कप राष्ट्रिय पुरुष भलिवल प्रतियोगिता’मे विभागिय टोली त्रिभुवन आर्मी क्लब ओ सुदूरपश्चिम प्रदेश विजयी सुरुवात करले बटै ।
कैलालीके धनगढीमे सोम्मारसे सुरु हुइल प्रतियोगिताअन्तर्गत उदघाटन खेलमे आर्मी ओ दुसरा खेलमे घरेलु टोली सुदूरपश्चिम विजयी हुइल हो ।
पहिल खेलमे आर्मीसे कर्णाली प्रदेशहे ३–० के सोझा सेटसे हराइल । आर्मीसे कर्णालीहे २५–१८,२५–१० ओ २५–१६ के सेटमे हराइल हो । ओस्टेक सोम्मार हुइल दुसरा खेलमे सुदूरपश्चिम प्रदेशसे मधेश प्रदेशहे २५–१७, २५–२२ ओ २५–२२ के सोझा सेटसे पराजित करले बा ।
सुदूरपश्चिम प्रदेश खेलकुद परिषद्के आयोजनामे सुरु हुइल प्रतियोगिताके सुदूरपश्चिम प्रदेशके मुख्यमन्त्री त्रिलोचन भट्ट उदघाटन करले रहिट । भट्ट खेलकुदहे चलायमान बनाइक लाग प्रदेश सरकार प्रतिवद्ध रहल बटैलै । ‘कोभिड–१९ के संक्रमणके कारण खेलकुदके गतिविधि हुई सेकल नइरहे,’ मुख्यमन्त्री भट्ट कहलै, ‘अब्बे संक्रमण घटलपाछे खेलके गतिविधि सुरुवात हुइल बा । भौतिक संरचना निर्माणफे सुरु करल बा ।’
आयोजक प्रदेश खेलकुद परिषद्के सदस्य सचिव दीपकबहादुर सिंहके अनुसार १२ गतेसम सञ्चालन हुइना राष्ट्रिय भलिवल प्रतियोगितामे सात ठो प्रदेश ओ तीन ठो विभागीय करके १० टोलीके सहभागिता रहल बा । उहाँक अनुसार प्रतियोगिताके विजेतासे नगद चार लाख, उपविजेतासे दुई लाख, टिसरा हुइना टोली एक लाख ओ चौठा स्थान प्राप्त कैना टिम ५० हजार नगदसहित ट्रफी ओ मेडल प्राप्त करही ।
प्रतियोगिताके सर्वोत्कृष्ट खेलाडीहे नगद २० हजार तथा उदयमान खेलाडी, उत्कृष्ट लिफ्टर, उत्कृष्ट स्पाइकर, उत्कृष्ट ब्लकर, उत्कृष्ट डिफेन्सर, उत्कृष्ट सर्वर ओ उत्कृष्ट प्रशिक्षकहे जनही १० हजारसहित पुरस्कृत कैना सिंह बटैलै । प्रत्येक खेलके म्यान अफ द म्याचहे नगद एक हजार पाँच सय नगदसहित पुरस्कृत करही । सदस्य सचिव सिंह प्रतियोगिता सर्वाधिक पुरस्कार राशिके रहल दाबी करले बटै । प्रतियोगिताअन्तर्गत मंगर चार खेल हुई ।
