गोदावरीमे भूमिहिनके जग्गा नापी सुरु

पहुरा समाचारदाता
अत्तरिया, ९ चैत । कैलालीके गोदावरी नगरपालिकामे जग्गा नापीके काम सुरु हुइल बा । गोदावरी नगरपालिका–५, बरबट्टासे नगरपालिका भूमिहिन दलित, भूमिहीन सुकुम्बासी ओ अव्यवस्थित बसोबासीके जग्गा नाप जाँच करना सुरु करल हो ।

जग्गा नाप जाँचके गोदावरी नगरपालिकाके नगरप्रमुख हरिसिंह साउँद सुभारम्भ करलैं । उहाँ केन्द्रमे सरकार विगठन हुइल ओ आयोग विगठन होके काममे ढिलाई हुइलेसे फेन आब काम द्रु्रत गतिमे आघे बह्रना बटैलैं । उहाँ अभिन फेन दक्ष प्राविधिकके अभाव रलेसे ओकर व्यवस्थापन करना बटैलैं ।

जग्गा नापीके सुभारम्भ कार्यक्रममे गोदावरी नगरपालिकाके उपप्रमुख रत्ना कडायत जग्गा नापीके काममे सहयोग करना स्थानीयहुकनहे आग्रह करलि । उहाँ जग्गा नापीके काममे विवाद हुइलेसे काममे ढिलाई हुइ सेक्ना बटैलि ।

भूमिहिन दलित, भूमिहिन सुकुम्बासीहे जग्गा उपलब्ध करैना ओ अव्यवस्थित बसोवासीहे व्यवस्थापन करेक लाग कैलालीके गोदावरी नगरपालिका ओ राष्ट्रिय भूमि आयोग बीच पुस २४ गते सम्झौता हुइल रहे ।

यीआघे देवीप्रसाद ज्ञवाली नेतृत्वके भूमिसम्बन्धी समस्या समाधान आयोगसंग हुइल सम्झौताके १ वर्ष पाछे पुनः वर्तमान सरकारसे गठन करल औरे आयोगसंग सम्झौता हुइल रहे ।

यिहिनसे आघे भूमिसम्बन्धी समस्या समाधान आयोग शेरबहादुर देउवा नेतृत्वके सरकार मन्त्रिपरिषद्से साउन १९ गते खारेज करले रहे ।

भदौ २९ गते मन्त्रिपरिद्के बैठकसे राष्ट्रिय भूमि आयोग गठन कैके अध्यक्षमे केशव निरौलाहे नियुक्त करलपाछे फेनसे सम्झौता कैके भूमिहिन दलित, सुकुम्बासी ओ अव्यवस्थित बसोबासीहे लालपुर्जा वितरण करना काम आघे बह्रल रहे ।

नगरपालिका भित्तर १८ हजार ६४ जाने भूमिहिन दलित, सुकुम्बासी ओ अव्यवस्थित बसोबासीके लगत फारम संकलन हुइल बा ।