लोकसेवा तयारीके लाग उत्प्रेरणात्मक अभिमुखीकरण

पहुरा समाचारदाता
बर्दिया, ९ चैत । युवाहुकनहे निजामती सेवाओर आकर्षण बह्रैनाके साथे लोकसेवा आयोगके परीक्षा तयारी करना तरिकाबारे ३ दिने उत्प्रेरणा अभिमुखीकरण समापनहुइल बा । जिल्लाके राजापुर नगरपालिका–२, जोतपुरस्थित युनिक नेपालसे आयोजना करल उ अभिमुखीकरणमे २४ जाने युवा विद्यार्थीहुक्रे सहभागी रहैं ।

युनिक नेपालके अध्यक्ष प्रिमबहादुर थारु युवा विद्यार्थी परिवार ओ समाजके भविष्य रहल ओरसे समयमे अध्ययन करना ओ सम्भावना खोजे परना बटैलैं । उहाँ लोकसेवाक तयारी करलेसे सबके भविष्य सुनौलो हुइना बटैलैं । ओस्टेक, युनिक नेपाल टमान कार्य करटि आइल उहाँ बटैलैं ।

कार्यक्रममे विद्यार्थी लागूऔषध, दुव्र्यसनीमे लागके जीवन वर्वाद करनासे फेन लोकसेवाओर लागके अपन भविष्य निर्माण करेपरना युनिक नेपालके सचिव निर्मला चौधरी बटैलैं ।

युनिक नेपालके कार्यक्रम अधिकृत सोम डेमनडौरा निजामति सेवा मार्फत देश ओ जनताके सेवा करना ओ सुशासनमार्फत सेवाप्रणालीहे चुस्त बनाइ सेक्न बटैलैं । अधिकृत डेमनडौरा युनिक नेपाल लोकसेवा तयारीके लाग युनिक नेपालके पुस्तकालयमे खरिदारसे अधिकृतसमके पुस्तक रहल ओरसे यकर लाभ उठैना समेत अनुरोध करलैं ।