सुदूरपश्चिमहे नेट रनरेटमे पाछे पारके कर्णाली फाइनलमे

पहुरा समाचारदाता
धनगढी, १० चैत्र । धनगढीमे जारी मुख्यमन्त्री कप यु–१९ महिला राष्ट्रिय क्रिकेट प्रतियोगितामे सुदूरपश्चिम प्रदेशहे नेट रनरेटमे पाछे पारके कर्णाली प्रदेश फाइनल प्रवेश करले बा । सुदूरपश्चिम बिफेक रोज बागमती प्रदेशहे ६ विकेटले पराजित कैके कर्णालीसँग अंक बराबरी करले रहे । मने नेट रनरेटमे कर्णालीसँग पाछे परके सुदूरपश्चिम उपाधि होडसे बाहिरल हो ।

फाप्ला क्रिकेट मैदानमे बिफके रोज हुइल खेलमे सुदूरपश्चिम बागमतीउप्पर ६ विकेटके जित दर्ता करल । टस हटके ब्याटिङके निम्तो पाइल बागमती १८.३ ओभरमे अपन सक्कु विकेट गुमाके ८२ रन बनैले रहे । ८३ रनके विजयी लक्ष्य पछ्याइल सुदूरपश्चिम ११ ओभरमे ४ विकेट गुमाके लक्ष्य भेटाइल । सुदूरपश्चिमके जितमे सावित्री धामी अविजित २३ ओ यशोदा विष्ट अविजित १८ रन बनैलैं । उ आघे बागमतीके लाग हेलिशा गुरुङ २२ रन बनैलि । उहिनहे १८.३ ओभरमे रोकेक लाग सुदूरपश्चिमके स्नेहा महरा, अनु खडायत ओ यशु पाण्डेय समान २÷२ विकेट लेलैं । खेलेके प्लेयर अफ दी म्याच सुदूरपश्चिमके सावित्री बन्लि ।

बुधके रोज लुम्बिनीसँग पराजित हुइलेसे फेन सुदूरपश्चिमहे रनरेटमे पाछे पारके फाइनल पुगल कर्णाली आब काल्ह (शुकके रोज) उपाधिके लाग गण्डकीसँग प्रतिस्पर्धा करि । गण्डकी यीआघे मधेस प्रदेशहे पराजित करटि फाइन प्रवेश करसेकल बा ।

नेपाल क्रिकेट संघ(क्यान) के आयोजनामे जारी प्रतियोगिताके विजेता टिम पाँच लाख ओ उपविजेता तीन लाख नगदसहित ट्रफि, मेडल ओ प्रमाणपत्र प्राप्त करि ।

प्रतियोगितामे ७ प्रदेशके १९ वर्ष टरेक महिला राष्ट्रिय क्रिकेट टिमके खेलाडीके सहभागिता रहल संघके प्रदेश अध्यक्ष हरि रेग्मी बटैलैं । ११ गतेसम चल्न प्रतियोगिताके प्रवद्र्धक सुदूरपश्चिम प्रदेश खेलकुद परिषद् रहल बा ।