नेपाली जनताके सुरक्षा पहिल प्राथमिकता होः प्रधान सेनापति शर्मा
पहुरा समाचारदाता
धनगढी, १० चैत । प्रधान सेनापति प्रभुराम शर्मा देशके सुरक्षा, सार्वभौमसत्ता, अखण्डता ओ नेपाली जनताके सुरक्षा सेनाहके पहिल प्राथमिकता रहना बटैले बटैं ।
बिफके रोज भवानी दल तेघरीमे आयोजित कैलाली–कञ्चनपुरके नेपाली सेना भूतपूर्व सैनिक सम्मेलनमे नेपाली जनतासे बनाइल संविधानसे अधिकार डेहल कारण अपन अधिकार क्षेत्रमे रहिके नेपाली सेना सेवा करटि रहल उहाँ बटैलैं ।
उहाँ देश ओ जनताके सुरक्षाके लाग सेवारत तथा अवकाश प्राप्त सैनिक फेन तयार रहेपरना बटैलैं । उहाँ बहालवाला सेनासंग अवकाश प्राप्त सेना फेन देश ओ जनताके सेवाके लाग तयार रहेपरना बटैलैं ।
प्रधान सेनापति शर्मा नेपाली सेनाके संगठनमे रहल बेला प्राप्त करल तालिम, ज्ञान, सीप ओ अनुभव नेपाली माटिमे लगैना भूपू सैनिकहे आग्रह करलैं । ओस्टेक, उहाँ राष्ट्र ओ समाजहे डेहल योगदान कबु खेर नैजैना हुइल ओरसे परिश्रम ओ देशभक्तिके ज्ञान औरेहे सिखाके सहयोग पुगैनामे जार करलैं ।
उ अवसरमे १०६ वर्षिया एकल महिला भद्रकाली कठायत ओ ९३ वर्षिय खड्गजीत खत्रीहे ज्येष्ठ भूपू तथा एकल महिलाके सम्मान प्रदान करल रहे ।
कार्यक्रममे सुदूरपश्चिम क्षेत्रके वेषभूषा, झाँकी प्रदर्शन करले रहे । सम्मेलनमे कैलालीके ९ सय १९ ओ कञ्चनपुरके एक हजार ३ सय ४४ भूपू सैनिक तथा एकल महिला परिवारके सहभागिता रहे ।
