पहिले माग पुरा टब भोट

पहुरा समाचारदाता
धनगढी, ११ चैत । कैलालीके धनगढी उपमहानगरपालिका–१७ मे रहल धुरझन्ना सुकुम्बासी शिविरबासीहुक्रे अपनेहुकनके माग पुरा करुइयाहे केल अइना चुनावमे भोट डेना बटैले बटै ।

गोदावरीके हरैयासे उठाके धनगढीके धुरझन्नामे बैठाइल ६४ घर परिवारके सुकुम्बासीहुकनके बस्तीमे विजुली वत्ती, डगरघाट, खानेपानी ओ शिविरहे संरक्षण कैना तटबन्धके माग रहल बा । तत्काकालिन नेकपा माओवादी हरैयामे रणबहादुर शाहके व्यक्तिगत जग्गा कब्जा करके सुकुम्बासीहुकन उ ठाउँमे बैठैले रहे । मने वहाँसे २०७५ सालमे ओइन उठाके धुरझन्नामे बैठाइल रहे । लौवा ठाउँमे सारलपाछे उ शिविरमे डगरघाट, विजुली वत्ती, खानेपानीके समस्या हुइल उ शिविरबासी राजेश्वरी रोकाया बटैली ।

उहाँ कहली, लौवा ठाउँमे सारलपाछे डगरघाट मजा नइहो, भर्खर विजुलीके पोल गारके तारके टानल बा । मिटर जडानके लाग करिब ११ हजार लग्ना बा । खानेपानीके लाग नल्काके समेत व्यवस्था नइहो । वस्तीके समस्याबारे स्थानीय सरकारहे बाट राखल मने मागके सुनुवाई ढिला करल राजेश्वरी बटैली ।’

शिविरमे ६४ घर बा । वहाँ चार/पाँच घरेक मनै प्रयोग कैना मेरिक एक÷एक ठो नल्का डेहल बा । उहीसे समस्या अइटी रहल ओरसे कम्तीमे प्रत्येक घरेक मनैनहे एक/एक ठो नल्काके व्यवस्था हुई परल उहाँ कहली । खुला दिसामुक्त घोषणा हुइल मने चर्पीके समेट व्यवस्था नइरहल राजेश्वरी बटैली ।

स्थानीय चुनावी मिति घोषणा हुसेकल बेला नेताहुक्रे जनता खोज्ना बेला हम्रे नेता खोज्ना बहुट विडम्बनाके बाट हो, उहाँ कहली । शिविरके पुरुव ओरसे शिवगंगा लडिया बस्तीके जग्गा कटटी रहल ओरसे पक्की तत्बन्ध हुई परल । डगरमे कालोपटरे नइहुइलेसेफे ग्राभेल डगरके पानी पिच करे पर्ना उहाँ बस्तीके माग रहल डोहरैली ।

उ शिविरके स्थानीय भोम्ली वादी अपनेहुकनथेन घरबास बाहेक कुछ नइरहल बटैली । हम्रे बेरोजगारी बटी कम्तीमे खेती योग्य जमिन हुई परल उहाँ कहली, –‘बस्तीमे विजुली वत्ती, डगरघाट, खानेपानी पुरा करे नइसेक्लेसे गाँस,बास ओ कपास भर पुरा करेक परल ।’

शिविरके गोविन्द विक अपन नाउँमे जग्गा नइहुइलपाछे फेरसे यहाँसे उठाके कहु पठैही की कना डर रहल बटैलै । उहाँ कहलै, ‘१६ बरस हरैयामे बैठली, वहाँसे उस्टाके यहाँ नन्लै, यहाँ झन विजोग हुइल बा । हरैयामे बैठेबेर कम्टी कुछ काम टे मिले यहाँ टे कामफे नइमिलठ । धनगढी बजार दुर परठ । कुछ व्यवसायके लाग बैंकसे कुछ लोण निकारी कलेसे अपन नाउँमे जग्गा नइहो । अभिनफे दुसरके जमिनमे बैठल जैसिन बा ।

हरैयामे रहल बेला ढुङगा लोड कैना काम मिले । अत्तरिया बजार लग्गे रहे मजदुरी कैनाफे सहजुल रहे मने धुरझन्ना आइलपाछे दैनिक जोहो टर्नाफे धौ–धौ हुइल विक बटैलै । घर–घर नल्का नइरहल बेला दुसरके नल्कामे जाईबेर विभेद समेट करुवा पाइल उहाँ बटैलै । बस्तीमे गारमे एक ठो आरटीजन धाराके प्रयोग करल उहाँ बटैलै ।

याक नेपालके सर्जुप्रसाद चौधरी बस्तीके समस्याहे खाद्य अधिकार सवलीकरण परियोजनासे जोरके लैजैना बटैलै । उहाँ कहलै, हरेक समुदायके व्यक्ति अपन हकअधिकारके लाग बोले परठ, राज्यके निकाय अपनही आके नइडि, टबमारे हम्रे सचेत हुइना जरुरी बा । आधारभूत समस्या जटराफे आवश्यकता बा शिविरवासी अपने पहलमे आवाज उठैना कोशिस कैना सह्रनिय हो ।’ हम्रेफे ओइनेके समस्याप्रति सहकार्य करके जैना जरुरी रहल उहाँ कहलै ।

धनगढी उपमहानगरपालिका–१७ के अध्यक्ष माधवराज राना बस्ती बैठल बेला सुरुमे १०/१० किलो चाउर राहत, जिल्ला प्रशासनके पहलमे डस्नाके व्यवस्था करल बटैलै । खरके छाना विस्थापित (सुरक्षित आवास) कार्यक्रम अन्र्तत ६४ टिनके कर्कट पाटाके व्यवस्थाफे करल उहाँ बटैलै । बस्ती बचाइक लाग रेडक्रसके पहलमे ६ लाख ओ नगरपापालिकाके सहयोगमे ४ लाख करके १० लाख तटबन्धके व्यवस्था करल बटैलै । उहाँ कहलै, तटबन्धके व्यवस्था नइहुइट टे आधा बस्ती कटजाइट, चर्पीके रिङ डेना निर्णय कराइल काम हुई नइसेकल उहाँ बटैलै । यी बरष पाँच ठो नल्का गारल बा । नगरपालिकासे प्रत्येक घर÷घर नल्का गरना चाहना रहल बटैलै ।

आर्थिक बर्ष २०७७/७८ सालमे पाँच लाखमे नमुना बस्तीके लाग लाईन विस्तार करे परठ कहिके बजेट छुटयाइल उहाँ बटैलै । विजुलीके वाइरिङके लाग एक ठो संस्थासे बाट करलफे अध्यक्ष बटैलै । डगरघाटके लाग एक/दुई दिनभिटरे ग्राभेल डरना ओ भारी तटबन्धके लाग भर संघसे बाट रख्ना बटैलै ।

नेकपा एमालेके रणबहादुर चन्द बस्ती जोगाइक लाग केन्द्रीय सरकारके प्रतिनिधि नारादमुनी रानासे बजेटके लाग पहल कैना बटैलै । नेकपा एमाले सन्तोष घर्तीफे बस्तीके समस्या समाधानके लाग पार्टीसे पहल कैना प्रतिवद्धता जनैलै । ओस्टेक माओवादी केन्द्रके प्रतिनिधि रामबहादुर चौधरी चिल्ला बाट कैना मनैन आब चिन्हे पर्ना बेला आइल बटैलै । उहाँफे उ बस्तीके समस्याके समाधानके लाग पार्टीभिटर बाट रख्ना बटैलै ।

बस्तीके लोकबहादुर केसी संघीय, प्रदेश ओ स्थानीय सरकार अपन–अपन जिम्मेवारी अनुसार काम कैडेना आग्रह करलै । उहाँ नगरपालिकाहे इङिगत करटी भर्खर बन्टी रहल बस्ती ढेर छुटयाइल मने भुख्ले बैठल बस्तीमे कम बजेट विनियोजन करल आरोप लगैलै ।

गोदावरी नगरपालिकाके हरैयासे उठाके धुरझन्नामे सारेबेर ६४ घरपरिवारके सामुहिक लाग पुर्जा बनल बा । हरैयाके उ जमिन्दार रण बहादुर शाह वहाँसे धुरझन्नामे ढरेबेर प्रत्येक घर परिवारके जग डारेक लाग प्रतिघर ७० हजारके दरसे रुप्या डेहल रहे । ओम्ने नगरपालिकासे ३०/३० हजार ठप करले रहे । कलेसे प्रतिघर परिवारहे ५०/५० हजारके दरसे सुरक्षित आवास अन्तर्गत कर्टट पाटाके सहयोग करले रहे ।