धार्मिक ज्ञान महायज्ञ सुरु
पहुरा समाचारदाता
धनगढी, ११ चैत । कैलालीके धनगढी उपमहानगरपालिका–७, देवहरियास्थित शिव माध्यमिक विद्यालयके शैक्षिक तथा भौतिक उन्नतीके लाग धार्मिक ज्ञान महायज्ञ सुरु हुइल बा ।
धार्मिक ज्ञान महायज्ञके उदघाटन नेपाली काँग्रेसके नेतृ डाक्टर आरजु राणा देउवा करले रहिट । महायज्ञके उदघाटन कार्यक्रममे बोल्टी उहाँ धार्मिक ज्ञान महायज्ञ केवल भौतिक पूर्वाधार निर्माण कैना केल नइहुके आध्यात्मिक ज्ञान बह्रैना बटैले बटी । ‘अब्बे दश कक्षासम बन्ना ओ शिक्षकफे निजी स्रोतसे चल्टी रहल विद्यालय हो कना जानकारी पैले बटु,’ नेतृ देउवा कहली,–‘यिहीहेफे सरकारीमे कहु कटै करे सेक्जाई की ओम्नेफे मै पहल करल ।’ विद्यालयके भौतिक पूर्वाधारके लाग अपन ओरसे करे पर्ना सहयोग कैनाफे उहाँ बटैली ।
चैत १७ गतेसम आयोजना हुइना धार्मिक ज्ञान महायज्ञमे प्रमुख वाचक अन्तराष्ट्रिय भागवत भूषण वाचक शिरोमणी आचार्य नारायण शरण ज्यू पूज्य सञ्जेल जी महाराजसे करटी रहल बटै ।
‘भागवत पुराण जे वाचन करठै, ओइने ढेर महान हुइट । अटरा ढेर श्लोक । अटरा ढेर ग्रन्थ’ नेतृ आरजु राणा देउवा कहली, ‘दुई वर्ष आघे मै फे घरेम भागवत वाचन करैले रहु । कहु ढेर ज्ञान हुई पर्ना रहठ कना मही पत्ता हुइल । एक ठो पिएचडी नही ओइने १० ठो पिएचडी बराबरके ज्ञान रहल उहाँ बटैली ।
