भलिबल कपके उपाधि आर्मीहे
पहुरा समाचारदाता
धनगढी, १२ चैत । त्रिभुवन आर्मी क्लबसे कैलालीके धनगढीमे हुइल ‘मुख्यमन्त्री कप राष्ट्रिय पुरुष भलिबल प्रतियोगिता’के उपाधि जिटले बा ।
शनिच्चर हुइल फाइनलमे नेपाल पुलिस क्लबहे पराजित करटी आर्मी उपाधि जिटल हो । उपाधिसंगे आर्मीसे नगद चार लाखसहित ट्रफी ओ मेडल प्राप्त करले बा कलेसे पुलिससे दुई लाखमे चित्त बुझैले बा ।
फाइनलमे आर्मीसे पुलिसहे ३–१ के सेटसे पराजित करल हो । पहिल ओ दुसरा सेट २५–२३ ओ २५–२० से जिटल आर्मीसे टिसरा सेट भर १८–२५ से गुमाइल । चौठा सेट २५–२२ से जित्टी आर्मी उपाधिउप्पर कब्जा जमाइल हो ।
उ आघे टिसरा स्थानके लाग हुइल खेलमे गण्डकी प्रदेशसे विभागिय टोली एपीएफहे पराजित करले बा । गण्डकीसे एपीएफहे ३–१ के सेटसे पराजित करल हो । टिसरा हुइना गण्डकीसे एक लाख ओ चौठा स्थान प्राप्त कैना एपीएफसे ५० हजार नगदसहित ट्रफी ओ मेडल प्राप्त करले बटै ।
सुदूरपश्चिम प्रदेश खेलकुद परिषद्के आयोजनामे हुइल प्रतियोगिताके विजेता खेलाडीहे सुदूरपश्चिमके सामाजिक विकासमन्त्री लालबहादुर धामीके वडका पहुनामे हुइल कार्यक्रममे पुरस्कृत करल बा । प्रतियोगिताके सर्वोत्कृष्ट खेलाडी आर्मीके मानबहादुर श्रेष्ठ हुइलै । उहाँ नगद १५ हजार प्राप्त करलै ।
ओस्टेक उदयमान खेलाडी सुदूरपश्चिमके दिनेश चन्द, उत्कृष्ट लिफ्टर आर्मीके हरिहजुर थापा, उत्कृष्ट स्पाइकर नेपाल पुलिस क्लबके रविन चन्द, उत्कृष्ट ब्लकर आर्मीके हरि अधिकारी, उत्कृष्ट डिफेन्सर गण्डकीके राजन दर्लामी, उत्कृष्ट सर्वर नेपाल पुलि क्लबके इमराना मगर ओ उत्कृष्ट प्रशिक्षक आर्मीके जगतबहादुर सिंह हुइलै ।
ओइनहे जनही १० हजारसहित पुरस्कृत करल आयोजक सुदूरपश्चिम प्रदेश खेलकुद परिषद्के सदस्य सचिव दीपकबहादुर सिंह बटैलै । प्रतियोगितामे तीन विभागिय ओ ६ प्रदेश करके ९ टोलीके सहभागिता रहल रहे ।
सुदूरपश्चिम घर रहल खेलाडी सम्मानित
मुख्यमन्त्री कप राष्ट्रिय पुरुष भलिबल प्रतियोगिताके समापन कार्यक्रममे सुदूरपश्चिम घर रहल भलिबल खेलाडीहे सम्मान करल बा ।
सुदूरपश्चिम प्रदेश खेलकुद परिषद्के सदस्य सचिव सिंहके अनुसार नेपाली टोलीके १५ वर्षसम कप्तानी करल अछामके भरत शाहसहित ८ जनहनहे सम्मान करल हो ।
सुदूरपश्चिम घर हुके नेपाली टोलीके प्रतिनिधित्व करटी रहल भलिबल खेलाडी राजेन्द्र बिष्ट, विनोद चन्द, दिनेश गिरी, विशाल विक, टेकराज अवस्थी, भैरव बम, रविन चन्द ओ दीपक जोशीहेफे सम्मान करल परिषद् जनैले बा ।
