श्रीपुर प्राथमिक स्वास्थ्य केन्द्रमे फार्मेसी सेवा शुरु

पहुरा समाचादाता
बेलौरी, १५ चैत । श्रीपुर प्राथामिक स्वास्थ्य केन्द्रमे फार्मेसी सेवा शुरु हुइल बा । कञ्चनपुरके बेलौरी नगरपालिका स्थित श्रीपुर प्राथामिक स्वास्थ्य केन्द्रमे फार्मेसी सेवा शुरु हुइल हो । एक औपचारिक कार्यक्रमके बिच बेलौरी नगरपालिकाके नगरप्रमुख पोतीलाल चौधरी फार्मेसी सेवाके उद्घघाटन करलैं ।

श्रीपुर प्राथामिक स्वास्थ्य केन्द्रमे डवाइ कराइ अइना विरामीनहे मध्यनजर कैके सब सेवा एक्के ठाउँसे डेना उद्देश्यसे फार्मेसी सेवाके सुरुवात करल श्रीपुर प्राथामिक स्वास्थ्य केन्द्रके प्रमुख गोबिन्द बिष्ट जानकारी डेलैं । नेपाल सरकार निशुल्क रुपमे उपल्बध करैटि आइल बिरुवा बाहेक औरे बिरुवा विरामीनहे डवाइके प्रिन्टेड मोलसो १० प्रतिशत कम मोलमे डेना प्रमुख बिष्ट बटैलैं ।

अस्टेके बेलौरी नगरपालिकाके नगर प्रमुख पोतीलाल चौधरी स्वास्थ्य क्षेत्रके लाग नगरपालिकासे १ करोड ५० लाख बजेट विनियोजन करल जनैलैं । न्युनतम तलवमे काम करल कर्मचारीनहे नगरपालिका थप सेवा सुविधा डेके उ कर्मचारीनके व्यवस्थापन समेत करल नगर प्रमुख चौधरी बटैलैं । ओस्टके प्रत्येक वडामे स्वास्थ्य बिमा कार्यक्रम अन्र्तगत एक–एक जहन स्वास्थ्य बिमा सहजकर्ता ढारल उहाँ बटैलैं ।