प्यारा टलुवा चैनार हुइल लागल
पहुरा समाचारदाता
पुनर्वास, १५ चैत । कञ्चनपुरकके पुनर्वासमे रहल प्यारा टलुवामे सरसफाई हुइल टबसे आन्तरिक पर्यटक लोग अउइया जहुइया मनैनसे चैनार हुइटी गैल बा ।
टलुवामे रहल कचरा ओ जलकुम्भीक झारपाट से साैन्दर्यमे कमि बिल्गाए । प्रधानमन्त्री राेजगार कार्यक्रम मार्फत टलुवाममे रहल जलकुम्भी हटाइल बाड अझकल टलुवा सोहावन ओ लोभावन हुइल बा ।
प्यारा टलुवामे अझकल टिकटक बनैना ओ चुक्की खउइयनके चम्पन हुइटी रहल पुनर्वास नगरपालिका वडा नम्बर ९ के वडाध्यक्ष नारायण प्रसाद जैशी बटैलैं । उहाँ कहलैं, अझकल रोजाना २-३ सय आन्तरिक पर्यटक सयर करे अइठैं ।
जलकुम्भी हटैना काममा भारतीय सुरक्षा बल एसएसबी अबराेध करे खोजले से फेन स्थानीयनके सक्रियतामे सरसफाई कार्यक्रमहे लग्ढार आघे बर्हाइल वडा अध्यक्ष नारायण प्रसाद जैशी बटैलैं ।
प्यारा टलुवामे मेरमेरिक प्रजातिके जलचर प्राणी मिल्ना, विश्वमे दुर्लभ हुइल मच्छी, खेचही, घोंघी फेन मिल्ना जानकार लोग बटैठैं । स्थानीय युवा लोग पर्यटन प्रवर्धनके लाग किस्टी फेन चालु कैले बटैं । ओहेमारे वहाँ जाके किस्टीमे बैठके टलुवामे सयर करे सेक्जाइठ ।
टलुवाके लोभावन सुन्दरता डेखके अझकल डुर डुरसे आन्तरिक पर्यटक लोग अइटि रहल पत्रकार जुद्ध चौधरी बटैलैं । उहाँक् बटाइल अन्सार, अझकल इ प्यारा टलुव आउर सक्कुहुनके प्यारा हुइटी गैल बा।
