ठाकुरबाबा नगरपालिकासे कैलारी गाउँपालिकाके अवलोकन

पहुरा समाचारदाता
धनगढी, १५ चैत । बर्दियाके ठाकुरबाबा नगरपालिकाके न्यायिक समितिके टोली कैलालीस्थित कैलारी गाउँपालिकाके अवलोकन÷भ्रमण करले बा ।

कार्य सम्पादन मूल्याङकनमे कैलारी गाउँपालिका नेपालके उत्कष्ट पाँच पालिकाभिटर परलपाछे कैलारीसे करटी आइल कामके बारेमे जानकारी लेना उद्देश्यसे उ टोली कैलारी गाउँपालिकाके भ्रमण करल हो । भ्रमण टोलीहे गाउँपालिकाके अध्यक्ष लाजुराम चौधरी, उपाध्यक्ष लक्ष्मी सत्गौंवा ओ कर्मचारी स्वागत करले रहिट ।

न्यायिक समितिके टोलीसे कैलारी गाउँपालिकाके न्यायिक समितिसे करटी आइल मजा काम, अभ्यासके साथे विविध विषयमे जानकारी लेहल गाउँपालिकाके प्रवक्ता कमलप्रसाद चौधरी बटैलै ।
समितिसे कैलारीके गाउँ सभा कक्ष, न्यायिक समितिके कक्षसमेत अवलोकन करले बा । ओस्टेक करके, कैलारी गाउँपालिका ओ ठाकुरबाबा नगरपालिकाके न्यायिक समितिके टोलीबीच छलफलफे हुइल बा ।

छलफलके क्रममे कैलारी गाउँपालिकाके उपाध्यक्ष एवम् न्यायिक समितिके संयोजक लक्ष्मी सत्गौंवासे न्यायिक समितिके कार्य सम्पादन प्रगति मजा रहल बटैली । उहाँ दर्ता हुइल करिब छ सय मुद्दामन्से पाँच सय मुद्दामे समितिसे मेलमिलाप करासेकल जानकारी डेली ।

न्यायिक समितिके कामप्रति जनतासे गुनासा नइसुनल ओ मेलमिलाप करल मुद्दा अभिनसम न्यायिक समितिमे फेर नइलौटल सत्गौंवाके कहाई रहे । उहाँ जनप्रतिनिधि ओ कर्मचारीबीच मजा सम्बन्ध रहल उल्लेख करटी जनतासे आइल गुनासाहे सक्कु जे मिलके सम्बोधन कैना करल बटैली ।

छलफलके क्रममे मेलमिलाप समितिके सदस्य विष्ण्ुा चौधरी कैलारी गाउँपालिकाके न्यायिक समितिसे करल कामके बारेमे जानकारी कराइल रहिट । ओस्टेक, ठाकुरबाबाके न्यायिक समितिसेफे अपने करल मजा काम ओ अभ्यासके बारेमे कैलारी गाउँपालिकाहे जानकारी कराइल बा ।

छलफलमे कैलारी गाउँपालिकाके जनप्रतिनिधि, गाउँपालिकाके प्रमुख प्रशासकीय अधिकृत वीरबहादुर ऐरसहित कर्मचारी, ठाकुरबाबा नगरपालिकाके न्यायिक समितिके पदाधिकारी ओ सदस्यहुकनके सहभागिता रहल रहे ।