अटोके ठक्करसे एकके मृत्यु
पहुरा समाचारदाता
धनगढी, १६ चैत । कैलाली धनगढी उपमहानगरपालिका–३, चटकपुरस्थित चालक गोदावरी नगरपालिका–५, गेटा बैठना बर्ष २८ के देवबहादुर बिकसे चलाइल अटोके ठक्करके एक पैदलयात्रीके मुत्यु हुइल बा ।
मंगरके रोज दुपहर एक बजे देव बहादुरसे चलाइल सुपप्र ०१००१ ह ४९८५ नम्बरके अटो पैदलयात्रीहे ठक्कर डेहल रहे । अटोके ठक्करसे घाहिल उ व्यक्तीहे प्रहरी टोली उपचारके लाग धनगढी स्थित मायामेट्रो अस्पताल प्रालिमे भर्ना करल रहे ।
पहिचान नइखुलल उ व्यक्तीके उपचारके क्रममे मृत्यु हुइल ओ अभिनसम मृतकके पहिचान हुई नइसेकल जिल्ला प्रहरी कार्यालय कैलाली जनैले बा । उमेर अन्दाजी ६०/६५ बर्षके जैसिन विल्गैना उप्पर शरिरमे खैयर रंगके अस्कोट ओ लाल भेष्ट, टरेक शरीरमे करिया जिन्स पाईन्ट, मुरीमे धाँका टोपी ओ गोरेम करिया चप्पल लगाइल, कपाल खौरल अवस्थामे ओ टरे उप्परके दाँत नइरहल पुरुष व्यक्ति रहल प्रहरी जनैले बा ।
हुलियाके आधारमे पहिचान हुइलेसे लग्गेक प्रहरी कार्यालय वा जिल्ला प्रहरी कार्यालयमे जानकारी कैनाफे अनुरोध करल बा ।
