सुदूरपश्चिमाञ्चल एकेडेमी मुख्य प्रायोजक
पहुरा समाचारदाता
धनगढी, १८ चैत । ‘टिसरा सुदूरपश्चिम स्पोर्टस अवार्ड २०७८’ हे सुदूरपश्चिमाञ्चल एकेडेमी मुख्य प्रायोजन करले बा । धनगढीमे रहल निजी क्षेत्रके प्रतिष्ठित क्याम्पस सुदूरपश्चिमाञ्चल एकेडेमी (एसपिए) मुख्य प्रायोजन करलसँगे अवार्डके नाउँ ‘एसपिए सुदूरपश्चिम स्पोर्टस अवार्ड’ रहना हुइल बा ।
देशके सर्वाधिक धनराशीके एसपिए कप क्रिकेट प्रतियोगिता आयोजना करसेकल कलेज खेलकुद क्षेत्रमे अग्रसर हुइटी आइल बा । बर्सेनि एसपिए महिला मेयर कप फेन आयोजना हुइटी आइल बा ।
नेपाल खेलकुद पत्रकार मञ्च कैलालीके अध्यक्ष सीताराम ओझा ओ सुदुरपश्चिमाञ्चल एकेडेमीके निर्देशक सुवाश शाही बीच प्रायोजन सम्बन्धी सम्झौता पत्रमे हस्ताक्षर हुइल बा । प्रायोजनपाछे एसपिएके निर्देशक शाही अवार्डसँग जरे पाके खुसी लागल बटैलै । लम्मा समयसे खेलकुद क्षेत्रमे सक्रिय शाही आगामी दिनमे अवार्डसँग निरन्तर जुरके साथ डेना प्रतिबद्धता जनैलै ।
अवार्डके टिसरा संस्करणके तयारी तिव्र रुपमे हुइटी रहल आयोजक खेलकुद पत्रकार मञ्च कैलाली जनैले बा । उच्च प्रदर्शन करल राष्ट्रिय तथा अन्तर्राष्ट्रिय क्षेत्रमे सफल हुइल खेलाडी ओ प्रशिक्षक कैके टमान ८ विधामे अवार्ड डेजैना बा । उत्कृष्ट खेलाडी पुरुष ओ महिला, उत्कृष्ट प्रशिक्षक, वर्ष युवा खेलाडी, स्पेसल अवार्ड, लाइफ टाइम एचिभमेन्ट अवार्ड, सुदूरपश्चिम आइकन महिला ओ पुरुष विधामे अवार्ड प्रदान करजैना बा ।
उत्कृष्ट खेलाडी पुरुष ओ महिला विधाके विजेताहे ३५/३५ हजार, उत्कृष्ट प्रशिक्षकहे ३० हजार, बरस युवा खेलाडी, स्पेसल अवार्ड ओ लाइफ टाइम एचिभमेन्ट अवार्डके विजेताहे २५/२५ हजार नगदसे पुरस्कृत करजैना आयोजक नेपाल खेलकुद पत्रकार मञ्च कैलाली जनैले बा । ओस्टके सुदूरपश्चिम आइकन महिला ओ पुरुष विधाके विजेताहे नगद २० हजार सहित ट्रफी, मेडल ओ प्रमाणपत्र प्रदान करजैना बा ।
‘सुदूरपश्चिम स्पोर्टस अवार्ड’के टिसरा संस्करणके मुख्य प्रबद्र्धकमे सुदूरपश्चिम प्रदेश खेलकुद परिषद् रहल बा । ओस्टके बर्षके पुरुष खेलाडी विधाहे काठमाण्डौंके मास ह्युम रिर्सोस ओ बर्ष महिला खेलाडी विधाहे वनदेवी युवा क्लब प्रायोजन करल बा । सह प्रायोजकमे केल्मी रहल बा ।
