पद्मा अस्पतालमे बिरामीके मृत्यु
पहुरा समाचारदाता
धनगढी, १९ चैत । कैलालीके गोदावरी नगरपालिका, अत्तरियास्थित पद्मा अस्पतालमे चिकित्सकके लापरवाहीसे बिरामीके मृत्यु हुइल कहटी आक्रोशित समूहसे तोडफोड करे लागल पाछे स्थिति तनावपूर्ण बनल बा ।
अस्पतालमे तोडफोड हुई लागलपाछे स्थितिहे नियन्त्रणमे लेना प्रहरीसे १४ सेल अश्रुग्यास प्रयोग करे परल बा ।
जिल्ला प्रहरी कार्यालयके प्रवक्ता प्रहरी नायब उपरीक्षक वेदप्रकाश जोशी थप क्षति हुई नइडेना धनगढीसेफे घटनास्थलमे प्रहरी टोली परिचालन करल बटैलै । उहाँ कहलै, ‘आक्रोशित तोडफोडमे उटरलपाछे भीडहे तितरवितर कैना अश्रुग्यास प्रयोग करे परल, स्थिति प्रहरीके नियन्त्रणमे बा ।’ तोडफोडसे अस्पतालके भ्यान, एम्बुलेन्स ओ भवनके सिसामे क्षति पुगल बा ।
उ अस्पतालमे शुकके रात उपचारार्थ भर्ना हुइल गोदावरी नगरपालिका–३ के ३७ वर्षीय विनोदकुमार बोहराके उपचारके क्रममे शनिच्चरके सकारे मृत्यु हुइलपाछे बिरामीके आफन्त आक्रोशित हुइल जनाइल बा ।
