वर्ष प्रशिक्षक ओ युवा खेलाडीके मनोनयन सार्वजनिक

पहुरा समाचारदाता
धनगढी, २२ चैत । ‘एसपिए सुदूरपश्चिम स्पोर्टस अवार्ड २०७८’ के ठप दुई विधाके मनोनयन सार्वजनिक करल बा ।

यी आघे वर्ष महिला ओ पुरुष विधाके मनोनयन सार्वजनिक हुइलमे वर्ष प्रशिक्षक ओ वर्ष युवा खेलाडीके मनोनयन सार्वजनिक हुइल हो । नेपाल खेलकुद पत्रकार मञ्च कैलालीसे धनगढीमे आयोजना हुइना स्पोर्टस अवार्डके टिसरा संस्करणके वर्ष प्रशिक्षकमे भलिवलके जगदिश भट्ट, फुटवलके ललित चन्द ओ वक्सिङके डमरदत्त भट्ट मनोनयनमे परल बटै ।

महिला भलिवल टोलीके मुख्य प्रशिक्षक जगदिश भट्ट बंगलादेशमे हुइल एभिसी सेन्ट्रल जोनके उपाधि नेपालहे जिटल रहिट । उहाँ लगातार दुसरा बार नेपाली महिला भलिवल टोलीहे च्याम्पीयन बनाइल हुइट ।

फुटबल प्रशिक्षक ललित चन्दसे नेपालगंजमे हुइल प्रसिडेन्ट कपमे कैलालीके स्टार सिटी युवा क्लबहे च्याम्पीयन बनाइल रहिट । उहाँ उहे प्रतियोगिताके उत्कृष्ट प्रशिक्षक समेत बनल रहिट । पहिल बार आयोजित नेपाल सुपर लिगमे धनगढी फुटबल उपविजेता बन्दा उहाँ सहायक प्रशिक्षक रहल रहिट । उहाँ नेपाली अण्डर–२३ फुटवल टोलीहेफे प्रशिक्षण डेहल रहिट ।

ओलम्पीयन समेत रहल वक्सिङके डम्बरदत्त भट्ट दुवइमे हुइल एसियन युथ एण्ड जुनियर च्याम्पियनसीपमे नेपाली खेलाडीहे पदक जिटैना मध्येके प्रशिक्षक हुइट । उहाँ प्रशिक्षण डेहल स्वस्तिका तिरुवा पहिल बार उ प्रतियोगितामे कास्य पदक जिटल रहिट । एसियन युथ एण्ड जुनियर च्याम्पियनसीपमे नेपाली टोली पहिल बार पदक जिटल बा ।

बर्ष युवा खेलाडीके मनोनयनमे क्रिकेटके लोकेश बम फुटबलके चन्द्रा भण्डारी ओ भलिवलके विशाल भण्डारी परल बटै । क्रिकेटके लोकेश बलमे कजर्‍यार उमेरमे युएइ विरुद्धके नेपाली टोलीसे डेब्यु करले बटै । उहाँ डेब्यु खेलमे २१ बलमे ३३ रनके आक्रमक पारी खेलल रहिट । घरेलु प्रतियोगितामे उत्कृष्ट प्रदर्शन करल उहाँ अण्डर–१९ नेपाली टोलीमे नइपरलेसेफे आईसीसी टी–२० विश्वकपके छनोट खेलमेफे प्लेइङमे परल खेलाडी हुइट । प्रधानमन्त्री कपमे ६ खेलमे १५२ रन बनैटी अपन क्लबहे उपाधि जिटल रहिट कलेसे आक्रमक रुपमे अर्धशतकीय पारी समेत लिखल रहिट ।

फुटबलके चन्द्रा भण्डारी महिला लिग छनोट प्रतियोगिताके उपाधि धनगढीहे जिटैना उत्कृष्ट प्रदर्शन करले रहिट । फाइनलमे दुई सहित ५ खेलमे १२ गोल करटी महिला लिग छनोट प्रतियोगिताके उत्कृष्ट फरवार्ड बनल रहिट । उन्नाई वर्ष टरेक साफ महिला फुटबल च्याम्पियनसिपमे नेपाली महिला फुटबल टोलीके सदस्यके रुपमे भुटान समेत गैल रहिट । हाल सञ्चालन हुइटी रहल राष्ट्रिय महिला लिगमे वालिङ विरुद्ध ह्याट्रिक सहित चार गोल ओ चन्द्रपुर नगरपालिका विरुद्ध एक गोल करटी प्लेयर अफ द म्याच हुइल रहिट ।

भबिलके विशाल भण्डारी कजर्‍यार उमेरमे खेलके छाप छोरना सफल हुइल बटै । १७ वर्षके उमेरमे क्षेत्रीय प्रतियोगितामे डेब्यु करटी उत्कृष्ट लिवरोके उपाधि समेत उहाँ जिटसेकल बटै । १८ वर्षके उमेरमे राष्ट्रिय पतियोगितामे डेब्यु करटी सुदूरपश्चिमके लाग उत्कृष्ट प्रदर्शन कैना खेलाडी मध्येमे विशाल परठै ।

यी आघे सार्वजनिक बर्ष पुरुष खेलाडीमे क्रिकेटके दिपेन्द्र सिंह ऐरी फुटवलके टिकेन्द्र थापा ओ व्याडमिन्टनके प्रिन्स दाहाल मनोनयनमे परल सार्वजनिक हुसेकल बा । ओस्टेक महिला वर्ष खेलाडीओर भलिबलके सरस्वती चौधरी, फुटबलके उषा नाथ ओ एथलेटिक्सके राजपुरा पछाई मनोनयनमे परल बटै । चार विधाके मनोनयन सार्वजनिक करल आयोजक नेपाल खेलकुद पत्रकार मञ्च आब बाँकी दुई विधाके मनोनयन सार्वजनिक हुइना जनैले बा । सुदुरपश्चिम आईकन महिला ओ पुरुष विधाके मनोनयन कुछ दिनमे सार्वजनिक हुइना मञ्चके महासचिव तथा कार्यक्रम संयोजक प्रदीप पाठक जानकारी डेलै । उहाँक अनुसार दुई विधा लाईफटाईम एचिभमेन्ट अवार्ड ओ स्पेशल अवार्डके घोषणा भर कार्यक्रम आयोजना हुइल स्थानमे घोषणा करजाई ।

अवार्डके मुख्य प्रायोजकमे धनगढीके सुदुरपश्चिमाञ्चल एकेडेमी रहल बा । एसपिए सुदूरपश्चिम स्पोर्टस अवार्ड’के टिसरा संस्करणके मुख्य प्रवद्र्धकमे सुदूरपश्चिम प्रदेश खेलकुद परिषद् रहल बा । पवद्र्धकमे धनगढी उपमहानगरपालिका ओ राष्ट्रिय खेलकुद परिषद रहल बटै । ओस्टेक वर्षके पुरुष खेलाडी विधाहे काठमाण्डौंके मास ह्युम रिर्सोस ओ बर्ष महिला खेलाडी विधाहे वनदेवी युवा क्लवसे प्रायोजन करले बा । वर्ष युवा खेलाडीहे निसर्ग अस्पताल बर्ष प्रशिक्षकहे सारथी अस्पताल ओ सुदुरपश्चिम आईकन महिला विधाहे मेरो रेडिमेड उद्योगसे प्रायोजन करले बा । ओस्टेक अवार्डके सह–प्रायोजकमे केल्मी ओ नवजीवन को–अपरेटिभ्स रहल बा ।

टमान ८ विधामे डेना अवार्डके टिसरा संस्करणके तयारी तिव्र रुपमे हुइटी रहल बा । उच्च प्रदर्शन करल राष्ट्रिय तथा अन्तर्राष्ट्रिय क्षेत्रमे सफल हुइल खेलाडी ओ प्रशिक्षक करके टमान ८ विधामे अवार्ड डेजाई । उत्कृष्ट खेलाडी पुरुष ओ महिला, उत्कृष्ट प्रशिक्षक, वर्ष युवा खेलाडी, स्पेसल अवार्ड, लाइफ टाइम एचिभमेन्ट अवार्ड, सुदूरपश्चिम आइकन महिला ओ पुरुष विधामे अवार्ड प्रदान करजाई ।

उत्कृष्ट खेलाडी पुरुष ओ महिला विधाके विजेताहे ३५/३५ हजार, उत्कृष्ट प्रशिक्षकहे ३० हजार, वर्ष युवा खेलाडी, स्पेसल अवार्ड ओ लाइफ टाइम एचिभमेन्ट अवार्डके विजेताहे २५/२५ हजार नगदसे पुरस्कृत कैना आयोजक नेपाल खेलकुद पत्रकार मञ्च कैलाली जनैले बा । ओस्टेक सुदूरपश्चिम आइकन महिला ओ पुरुष विधाके विजेताहे नगद २० हजार सहित ट्रफी, मेडल ओ प्रमाणपत्र प्रदान करजाई ।