पर्यटन प्रवर्द्धन कैना फारवेष्ट ट्राभल मार्ट

पहुरा समाचारदाता
धनगढी, २३ चैत । सुदूरपश्चिम प्रदेशके अस्थायी राजधानी धनगढीमे फारवेष्ट ट्राभल मार्ट आयोजना हुइना बा ।

पर्यटकीय सम्भावनाके उजागर, बजारीकरण कैना ओ पर्यटन विकासमे टेवा पुगैना उद्देश्यसे चैत २५ से २७ गतेसम मार्ट आयोजना हुई लागल हो । नेपाल पर्यटन बोर्ड ओ धनगढी उपमहानगरपालिकाके आर्थिक सहयोगमे नाट्टा सुदूरपश्चिम धनगढीस्थित रुबस होटलमे मार्ट आयोजना कैना बुधके पत्रकार सम्मेलन करके जानकारी डेहल बा ।

मार्टमे ३० ठो स्टल रहना फारवेष्ट ट्राभल मार्टके संयोजक माया प्रकाश भट्ट बटैलै । मार्टमे स्वदेशी तथा विदेशी करके ३०० से ढेर पहुना रहना ओ पहिल दिन उहाँहुकनबीच व्यावसायिक अन्तरक्रिया (बी टु बी) हुइना जनाइल बा ।

भारतीय पर्यटकहे भिटराइक लाग ढेरसे ढेर प्रचारप्रसार कैना उद्देश्यके साथ सुदूरपश्चिम ट्राभेल मार्ट आयोजना हुई लागल नेपाल पर्यटन बोर्डके कार्यकारी निर्देशक डा. धनञ्जय रेग्मी बटैलै । ‘मेला, महोत्सव जैसिन नइहो यी । मार्टमे कुछ सेलेक्टेड व्यक्ति केल सहभागी हुइठै, उहाँ कहलै । ‘सुदूरपश्चिममे घुमेक लाग ठाउँहुक्रे बटै कना डेखाइक लाग मार्ट आयोजना हुई लागल हो ।’ मार्टमे भारतके दिल्ली, नैनीताल, देहरादुन, खटिमा लगायतके ठाउँके पर्यटन व्यवसायी, टुर अपरेटर, गाइड, सञ्चारकर्मी अइना आयोजक जानकारी डेहल बा ।

मार्टके दुसरा दिन अतिथिहुकनहे धनगढीके शिवपुरी धाम, जाखोर ताल, बेहडाबाबा, कञ्चनपुरके लिङ्गा हुइटी शुक्लाफाँटा राष्ट्रिय निकुञ्ज, दोधारा चाँदनी झोलुङ्गे पुलके भ्रमण करैना जनाइल बा ।

टिसरा दिन घोडाघोडी बर्ड सेन्चुरी, टीकापुर पार्क, कर्णाली पुलके भ्रमण अवलोकनके साथे कर्णाली लडियामे ¥याफिटङ करैना आयोजक जानकारी डेले बा । दूरीके हिसाबसे भारतके कुछ सहर अत्यन्त लग्गे रहल ओरसे यी कार्यक्रमसे भारतीय पर्यटकहे सुदूरपश्चिमके भ्रमण करेक लाग सहयोग पुगैना विश्वास करल कार्यकारी निर्देशक रेग्मी बटैलै ।

‘सुदूरपश्चिममे गोरा पर्यटकहुकन केल भिटराई परठ कना नइहो । यहाँ आबके पर्यटन भारतीय पर्यटकप्रति ढेर लक्षित हुई परठ कहिके यी कार्यक्रम करे लागल हो’, उहाँ कहलै, ‘कोरोना कहरपाछे अब्बे नेपाल अइना सबसे ढेर पर्यटक भारतीय बटै । भारतीय पर्यटक अइना क्रम लगभग पहिलेक अवस्थामे पुगसेकल बा ।’

मार्टमे आइल भारतीय पर्यटन व्यवसायी नेपालके सुदूरपश्चिमके पर्यटकीय क्षेत्रहे समेटके अपन टुर प्याकेज बनैना आयोजक अपेक्षा करले बा । ‘हम्रे उहाँहुकनहे मजा डेखौना, खवैना, स्वागत सत्कार करे सेक्लेसे भर अवश्यफे भारतीय टुर अपरेटर प्याकेज बनैही, नाट्टा सुदूरपश्चिमके अध्यक्षसमेत रहल मार्टके संयोजक भट्ट कहलै ।

पर्यटन व्यवसायी, सञ्चारकर्मी लगायत करके भारतसे करिब डेढ सय पहुना अइना उहाँ जानकारी डेलै । ‘अब्बे डेढ सय अइठै, पाछे ओइने कैयौं व्यक्तिहे नन्ना हम्रे अपेक्षा करले बटी, भट्ट कहलै । ‘यहाँ रहल सम्भावनाहे व्यवसायिकरण करेक लाग अब्बे हम्रे खास करके बिक्रीकर्ता ओ खरिदकर्ताबीच बी टु बी कार्यक्रम करे लागल हुई ।’

मार्ट आयोजना कैना करिब ५०÷६० लाख रुप्या खर्च हुइना आयोजक जानकारी डेले बा । यकर लाग नेपाल पर्यटन बोर्ड ३० लाख, धनगढी उपमहानगरपालिका पाँच लाख रुप्या बजेट सहयोग करले बटै ।