सुप आईकन महिला ओ पुरुष विधाके मनोनयन सार्वजनिक
पहुरा समाचारदाता
धनगढी,२४ चौत । धनगढीमे हुइना टिसरा ‘एसपिए सुदूरपश्चिम स्पोर्टस अवार्ड २०७८’ अन्तर्गतके थप दुई विधाके मनोनयन सार्वजनिक हुइल बा । नेपाल खेलकुद पत्रकार मञ्च कैलालीसे आयोजना कैना टिसरा एसपिए सुदूरपश्चिम स्पोर्टस अवार्डके सुदूरपश्चिम आईकन पुरुष ओ महिला विधाके मनोनयन सार्वजनिक हुइल हो ।
सुदुरपश्चिम आईकन पुरुषके मनोनयनमे फुटवलके कुवेर सिंह, क्रिकेटके अर्जुन साउँद ओ भारात्तोलनके अशोक भण्डारी मनोनयनमे परल बटै । ओस्टेक सुदुरपश्चिम आईकन महिलाओर क्रिकेटके कविता कुँवर, बक्सिङके स्वस्तिका तिरुवा ओ तेक्वान्दोके गीता कठायत मनोनयनमे परल बटै ।
कुवेर सिंहके कप्तानीमे कैलालीके स्टार सिटी प्रिसेडेन्ट च्याम्पीयन बनल रहे । ओस्टेक उहाँक कप्तानीमे बाजुराके रानीवन क्लब सि क्वालिफाई हुइल रहे । उहाँक नेतृत्वमे रहल विजय स्पोर्टस क्लब जिल्ला च्याम्पीयन बनल रहे ।
अर्जुन साउँद डेब्यु करटी प्रधानमन्त्री कपमे पहिल शतक मारल रहिट । उहाँ एसीसी अण्डर १९ क्रिकेट प्रतियोगितामे श्रीलंका विरुद्ध अर्धशतक बनाइल रहिट । अशोक भण्डारी २४ औं राष्ट्रिय भारात्तोलन प्रतियोगितामे सुदुरपश्चिमहे स्वर्ण जिटाइल रहिट । उहाँ उहे प्रतियोगितामे उदयमान ओ सम्भाव्य खेलाडीके उपाधि जिटल रहिट । ओस्टेक राजविराजमे हुइल भारात्तोलन प्रतियोगितामेफे स्वर्ण जिटल रहिट ।
क्रिकेटर कविता कुँवर आईसीसी महिला टी–२० विश्वकप एसिया क्षेत्र छनौटमे सहभागी हुइटी नेपाली टोलीसे डेम्बु करले बटी । प्रधानमन्त्री कप महिला राष्ट्रिय प्रतियोगितामे ४ खेलमे ७ विकेट ओ ४० रनके योगदान डेहल रहिट । ललितपुर मेयर कपमे सुदूरपश्चिम उपविजेता हुके ५ खेलमे ४० रन बनैटी उत्कृष्ट बलिङ करल रहिट ।
स्वसित्मा तिरुवा युएईमे सञ्चालन हुइल जुनियर तथा युथ ब्वाइज एण्ड गल्र्स बक्सिङ च्याम्पियनसिपमे नेपालहे कास्य पदक डेहुवाइल रहिट । उहाँ पहिल अन्तराष्ट्रिय प्रतियोगितामे पदक जिटल हुइट । जोर्डनमे आयोजित बक्सिङ प्रतियोगितामे उहाँ तीन चरण पार करल रहिट ।
ओस्टेक तेक्वान्दोकी गीता कडायतसे भर्खर काठमाण्डौंमे हुइल राष्ट्रिय तेक्वान्दो प्रतियोगितामे स्वर्ण जिटल बटी । उहाँ काठमाण्डौमे हुइल मेयर कपमे रजत पदक जिटल रहिट ।
अवार्डके मुख्य प्रायोजकमे धनगढीके सुदुरपश्चिमाञ्चल एकेडेमी रहल बा । ‘एसपिए सुदूरपश्चिम स्पोर्टस अवार्ड’ के टिसरा संस्करणके मुख्य प्रवद्र्धकमे सुदूरपश्चिम प्रदेश खेलकुद परिषद् रहल बा । प्रवद्र्धकमे धनगढी उपमहानगरपालिका ओ राष्ट्रिय खेलकुद परिषद रहल बटै । ओस्टेक बर्षके पुरुष खेलाडी विधाहे काठमाण्डौंके मास ह्युम रिर्सोस ओ बर्ष महिला खेलाडी विधाहे वनदेवी युवा क्लबसे प्रायोजन करले बा ।
वर्ष युवा खेलाडीहे निसर्ग अस्पताल बर्ष प्रशिक्षकहे सारथी अस्पताल, सुदुरपश्चिम आईकन पुरुष विधाहे माया मेट्रो हस्पिटल, सुदुरपश्चिम आईकन महिला विधाहे मेरो रेडिमेड उद्योग प्रायोजन करले बा । ओस्टेक करके स्पेशल अवार्डहे गरिमा पोलिक्लिनिक तथा राजधानी डेन्टल होम प्रायोजन करले बन । अवार्डके सह–प्रायोजकमे केल्मी ओ नवजीवन को–अपरेटिभ्स रहल बा ।
टमान ८ विधामे डेना अवार्डके टिसरा संस्करणके तयारी तिव्र रुपमे हुइटी रहल बा । उच्च प्रदर्शन करल राष्ट्रिय तथा अन्तर्राष्ट्रिय क्षेत्रमे सफल हुइल खेलाडी ओ प्रशिक्षक करके टमान ८ विधामे अवार्ड डेना बा । उत्कृष्ट खेलाडी पुरुष ओ महिला, उत्कृष्ट प्रशिक्षक, वर्ष युवा खेलाडी, स्पेसल अवार्ड, लाइफ टाइम एचिभमेन्ट अवार्ड, सुदूरपश्चिम आइकन महिला ओ पुरुष विधामे अवार्ड प्रदान करजाई ।
उत्कृष्ट खेलाडी पुरुष ओ महिला विधाके विजेताहे ३५/३५ हजार, उत्कृष्ट प्रशिक्षकहे ३० हजार, वर्ष युवा खेलाडी, स्पेसल अवार्ड ओ लाइफ टाइम एचिभमेन्ट अवार्डके विजेताहे २५/२५ हजार नगदसे पुरस्कृत कैना आयोजक नेपाल खेलकुद पत्रकार मञ्च कैलाली जनैले बा । ओस्टेक सुदूरपश्चिम आइकन महिला ओ पुरुष विधाके विजेताहे नगद २० हजार सहित ट्रफी, मेडल ओ प्रमाणपत्र प्रदान करजाई ।
