सुदूरपश्चिम प्रदेश सरकारमे काँग्रेसफे सहभागी हुइटी
काँग्रेसहे दुई मन्त्रीसहित एक राज्यमन्त्रीके जिम्मेवारी डेना
पहुरा समाचारदाता
धनगढी, २५ चैत । सुदूरपश्चिम प्रदेश सरकारमे अभिनसमके प्रतिपक्षी भूमिका निर्वाह करटी काँग्रेसकेफे सहभागिता हुइटी रहल बा ।
प्रदेश सरकारमे आन्तरिक मामिला तथा कानून मन्त्रालय ओ सामाजिक विकास मन्त्रालयके जिम्मेवारी पैले डेना कहल बा । आन्तरिक मामिला तथा कानून मन्त्री नेपाली काँग्रेसके डा. रणबहादुर रावल हे ओ सामाजिक विकास मन्त्री गोविन्द बोहोरा डेना कहल हो । ओस्टेक करके सामाजिक विकास मन्त्रालयके राज्यमन्त्री नेपाली काँग्रेसके टेक बहादुर रैका पैना कहल बा । यिहीसे आघे कानून मन्त्रीमे नेकपा एकिकृत समाजवादीके पूर्णा जोशी ओ सामाजिक विकास मन्त्रीमे नेकपा एकिकृत समाजवादीके लाल बहादुर खडका रहल रहिट ।
सुदूरपश्चिम प्रदेश सरकार गठन हुइल यहोर सामाजिक विकास मन्त्रालयमे गोविन्द बोहोरा चौठा मन्त्री बन्टी बटै । यिहीसे आघे दिर्घ बहादुर सोडारी, कृष्णराज सुवेदी ओ लालबहादुर खडका रहिट । ओस्टेक आन्तरिक मामिला तथा कानून मन्त्रीमे यिहे आघे प्रकाश शाह, पूर्णा जोशी रहिट । यी मन्त्रालयके बोहोरा टिसरा मन्त्री हुइट ।
सुदूरपश्चिम प्रदेश सरकारमे काँग्रेसके सहभागिता हुइलेसे आब तीन दलिय मन्त्रीमण्डल बन्ना हुइल बा । आब प्रदेश सरकारमे नेपाली काँग्रेसके भागमे आन्तरिक मामिला तथा कानून मन्त्रालय ओ सामाजिक विकास मन्त्रालय परल बा ।
नेकपा माओवादी केन्द्रके भागमे मुख्यमन्त्री तथा मन्त्री परिषदके कार्यालय, उद्योग पर्यटन वन तथा वातावरण मन्त्रालय, भूमि व्यवस्था कृषि तथा सहकारी मन्त्रालय परल बा । ओस्टेक नेकपा एकिकृत समाजवादीके भागमे भौतिक पूर्वाधार विकास मन्त्रालय ओ आर्थिक मामिला मन्त्रालय परल बा ।
प्रदेश सरकारके राज्य मन्त्रीमे नेकपा एकिकृत समाजवादीके तीन जाने रहिट । नेकपा माओवादी केन्द्र एक जाने राज्यमन्त्री पैले रहे ।
