स्पोर्टस अवार्डके तयारी अन्तिम चरणमे

पहुरा समाचारदाता
धनगढी, २६ चैत । धनगढीमे हुइना टिसरा ‘एसपिए सुदूरपश्चिम स्पोर्टस अवार्ड २०७८’ के तयारी अन्तिम चरणमे पुगल बा । धनगढीमे हुइना कार्यक्रम चैत २९ गते धनगढीके रातोपुलमे रहल रिद्धिसिद्धी पार्टी प्यालेसमे हुइल बा । टमान कार्यक्रम करेक लाग उपयुक्त रहल रिद्धिसिद्धि पार्टी प्यालेससे अवार्डहे साथ डेले बा । अवार्डमे प्यालेस भेनु पार्टनरके रुपमे रही ।

प्रायोजन सम्बन्धी सम्झौता पत्रमे रिद्धिसिद्धी पार्टी प्यालेसके प्रबन्ध निर्देशक प्रकाश जप्रेल ओ नेपाल खेलकुद पत्रकार मञ्च कैलालीके अध्यक्ष सीताराम ओझा हस्ताक्षर करलै ।

नेपाल खेलकुद पत्रकार मञ्च कैलालीसे आयोजना कैना स्पोर्टस अवार्डके मुख्य प्रायोजकमे धनगढीके सुदुरपश्चिमाञ्चल एकेडेमी रहल बा । ‘एसपिए सुदूरपश्चिम स्पोर्टस अवार्ड’ के टिसरा संस्करणके मुख्य प्रबद्र्धकमे सुदूरपश्चिम प्रदेश खेलकुद परिषद् रहल बा । प्रवद्र्धकमे धनगढी उपमहानगरपालिका ओ राष्ट्रिय खेलकुद परिषद रहल बा । ओस्टेक बर्षके पुरुष खेलाडी विधाहे काठमाण्डौंके मास ह्युम रिर्सोस ओ वर्ष महिला खेलाडी विधाहे वनदेवी युवा क्लव प्रायोजन करले बा ।

बर्ष युवा खेलाडीहे निसर्ग अस्पताल बर्ष प्रशिक्षकहे सारथी अस्पताल, सुदुरपश्चिम आईकन पुरुष विधाहे माया मेट्रो हस्पिटल, सुदुरपश्चिम आईकन महिला विधाहे मेरो रेडिमेड उद्योग प्रायोजन करले बा । ओस्टेक करके स्पेशल अवार्डहे गरिमा पोलिक्लिनिक तथा राजधानी डेन्टल होम ओ न्यु सिटी पोलिक्लिनिकसे लाईफटाईम एचिभमेन्ट अवार्ड प्रायोजन करले बा । अवार्डके सह–प्रायोजकमे ठाकुर एग्रो ईन्ड्रष्टिजक, केल्मी ओ नवजीवन को–अपरेटिभ्स रहल बा ।

टमान ८ विधामे डेना अवार्डके टिसरा संस्करणके तयारी तिव्र रुपमे हुइटी रहल बा । उच्च प्रदर्शन करल राष्ट्रिय तथा अन्तर्राष्ट्रिय क्षेत्रमे सफल हुइल खेलाडी ओ प्रशिक्षक करके टमान ८ विधामे अवार्ड डेना । उत्कृष्ट खेलाडी पुरुष ओ महिला, उत्कृष्ट प्रशिक्षक, वर्ष युवा खेलाडी, स्पेसल अवार्ड, लाइफ टाइम एचिभमेन्ट अवार्ड, सुदूरपश्चिम आइकन महिला ओ पुरुष विधामे अवार्ड प्रदान करजैना बा ।

उत्कृष्ट खेलाडी पुरुष ओ महिला विधाके विजेताहे ३५/३५ हजार, उत्कृष्ट प्रशिक्षकहे ३० हजार, वर्ष युवा खेलाडी, स्पेसल अवार्ड ओ लाइफ टाइम एचिभमेन्ट अवार्डके विजेताहे २५/२५ हजार नगदसे पुरस्कृत कैना आयोजक नेपाल खेलकुद पत्रकार मञ्च कैलाली जनैले बा । ओस्टेक करके सुदूरपश्चिम आइकन महिला ओ पुरुष विधाके विजेताहे नगद २० हजार सहित ट्रफी, मेडल ओ प्रमाणपत्र प्रदान करजाई ।